Insertidumbre riba futuro eksistensia di florin antiano kombiná ku kambio di patronchi riba uso di plaka kèsh ta e kousa prinsipal di e skarsedat di biyete ku tin aktualmente. Asina Emsley Tromp, presidente direktor di Banko Sentral di Kòrsou i St. Maarten a deklará.

Dor ku te ainda no tin desishon si ta mantené florin antiano òf si ta introdusí florin karibense no a manda imprimí mas biyete manera tabata e kustumber. Ta bini aserka ku e kompania ku ta imprimí sèn, mirando e insertidumbre ku ta reina, tampoko no a tene kuenta ku un pedido nobo.

Esaki ta pone ku apesar ku Banko Sentral a hasi pedido for mart ta te na sèptèmber numa nos lo por haña biyete nobo den sirkulashon.

Kalidat
E skarsedat di biyete ku tin aktualmente no ta un skarsedat físiko sino unu di kalidat. Loke ta pasa ta ku segun añanan ta transkurí e biyetenan ta bira bieu i e kalidat ta bai atras.

Konsekuentemente e mashinnan ku tin ku kontrolá outentisidat no por rekonosé e biyetenan aki mas i mester remplasá nan pa nobo. "Pues no ta asina ku no tin sufisiente biyete den stòk pero ta un kuestion di kalidat", Tromp ta remarká.

Skimming
Dor di e fenómeno di ‘skimming’ hopi banko komersial, komo medida di prekoushon,a baha e kantidat máksimo di plaka ku por disponé hasiendo uso di karchi di banko.

Esaki a kousa un kambio di patronchi serka usuarionan kaminda awor e hendenan ta kana ku muchu mas sèn kèsh den saku. Pues dor di e riesgonan di ‘skimming’ tin mas demanda pa sèn kèsh.