"Bo tin ku laga bo mes na kas ora bo bai pafó?' Esaki ta lema nobo di e kampaña nashonal kontra diskriminashon, ku a kuminsá algun dia pasá na Hulanda. Meta di e kampaña akí ta pa konsientisá hende ku sigur sigur ta bálapena pa notifiká kaso di diskriminashon. Fuera djesei a kaba di instituí un ret di ofisina anti-diskriminashon tambe ku ta kubri henter e pais.

Grasias na e kobertura nashonal akí tur hende di kualke munisipio por akudí na un di e ofisinanan pa notifiká keho. Direktor GertJan Ankoné di Antidiscriminatiebureau Hollands Midden en Haaglanden ta splika ku índole di e kehonan a kambia sí den kurso di aña.

Diskriminashon a kambia
"Tempu ku e kos akí a kuminsá tabata enfoká predominantemente riba diskriminashon di rasa, generalmente di outóktono pa ku alóktono", asina Ankoné ta konta. "E outóktono tambe a bira víktima hopi biá den último aña. Por ripará mas diskriminashon entre alóktononan mes tambe. Fuera djesei a bin otro aspektonan di diskriminashon aserka.

Na Den Haag ta trata aktualmente di seis pa sheteshen notifikashon pa aña. Pero segun Ankoné esei ta un nivel di notifikashon enormemente abou, si kompar'é ku e investigashon di loke hende ta eksperienshá na diskriminashon sin denunsiá nada: "Na Den Haag ta trata di por lo ménos un tersera parti ku ta hañ'é ku diskriminashon. Pero e víktima ta pensa: 'Ai, ki ke hasi ora nan zundrámi riba kaya?' Un'tin mod'i hasi."

Kita barera
Mester kita e barera ei, esta, kaminda ta suponé ku un keho no ta kontundente, i ta keda sin raportá e kos mésora. "E kampaña mester konsientisá hende pa nan sa ku sigur sigur bálapena pa notifiká kasonan di diskirminashon, maske ku ta parse ku e no ta kumbiníbo. Por tuma medida konhuntamente si drenta vários keho for di ún bario", segun Ankoné.

E direktor di Antidiscriminatiebureau Hollands Midden en Haaglanden ta kalkulá ku mas o ménos dies porshento di e kehonan ta bin di komunidat sürnam na Den Haag, miéntras ku tres porshento ta bin di Antianonan. "Aparentemente Sürnam i Antiano no ta kore pensa ku ta diskriminá nan. Esaki tabata mas fuerte den pasado, loke parsialmente por ta motibu di e porsentahenan relativamente abou", asina Ankoné ta suponé.

A produsí entreotro un televisiespot den kuadro di e kampaña nobo, kaminda por mira kon hende tin ku skonde nan identidat.