Iglesia katóliko na Hulanda ke un investigashon independiente di abuzu seksual. Djamars 9 di mart a tene un konferensha di obispu, kaminda a trata e asuntu. Polítikonan di entre otro VVD i PvdA tambe ke un investigashon, Van Bommel di SP ke un investigashon parlamentario. Kon otro paisnan a atendé ku abuzu seksual di Iglesia Katóliko?

Siman ku a pasa so kaba a drenta 200 i piku kaso nobo. Meskos ku anteriormente na Merka i Irlanda, ta parse ku no ta susfisiente mas pa atendé kada kaso apart. Tin nesesidat pa bini ku un splikashon ku ta akapará tur kos : Kon e kos por a para yega asina leu?

Tin algun similaridat ku e skandalnan na Merka i Irlanda. Ei tambe ta trata abuzu ku a tuma lugá algun desenia pasá kaba pero e víktimanan nunka no a haña hustisia. I meskos ku na Merka i Irlanda, reakshon di Iglesia tabata parti di e problema. Tabata skual òf trasladá e saserdote en kestion, mayoria biaha no tabata hasi nada mas.

Ad van Luyn
Segun presidente di konferensha obispal hulandes, monseñor Ad van Luyn, un investigashon independiente riba enkargo di Iglesia ta e mihó manera pa mustra ku tempu a kambia i ku awor outoridatnan di Iglesia ta kondená kada abuzu 'di un forma kla, kontundente i permanente'.

Van Luyn, obispu di Rotterdam, ta dun'e impreshon di tin e investigashon merikano di John Jay na mente. A publiká e investigashon ei na 2004, dos aña despues ku revelashonnan den e korant merikanu The Boston Globe a kondusí na un tormenta di indignashon nashonal.

Konferensha di obispu merikano a pidi John Jay College of Criminal Justice na New York pa nan hiba un investigashon profundo. Di e 7.700 kaso di abuzu ku a notifiká i ku a investigá despues, a konfirmá 6.700. Den dos porshento so di e kasonan, e kulpabel a kai será efektivamente.

E indagashon di John Jay te ainda ta forma e base pa kaba di atendé ku e skandal na Merka. Na aña 2007 so kaba iglesia a paga 615 mion di dòler na kompensashon. Víktimanan por apelá tambe na derecho eklesiástiko, ku no konosé kadukashon di tipo di kasonan asin'akí, kontrali na derecho sivil.

Dos wes
Tòg parlamentario hulandes Harry van Bommel di SP ta skohe via Twitter pa un otro enfoke. 'Komo katóliko i polítiko' e ke pa fayo di derecho eklesiástiko bira tema di un investigashon parlamentario. Tin un presedente pa esaki tambe: Irlanda.

For di mei di aña 2000 kaba gobièrnu di Irlanda a instituí un komishon ku mester a investigá abuzu di mucha den instituto i organisashonnan ku ta kai bou di responsabilidat di iglesia. E komishon bou di guia di wes Séan Ryan a konkluí aña pasá ku abuzu i maltrato tabata mas regla ku eksepshon.

Kasi den e mes tempu un otro wes, Yvonne Murphy, a bini ku konklushon apart pero mes espantoso tokante arsobispado na Dublin. Te awor e konklushonnan ei a kondusí na retiro di kuater obispo irlandes prominente.

Irlandes òf merikano
E desbentaha di e modelo irlandes ta ku e ta tuma asina tantu tempu. E mester keda presedé pa un desishon di gobìernu i mester stipulá mandato di e komishon(nan) ofisialmente. Ta e ora ei numa e trabou mes por kuminsá.

I mientras ku no ménos ku 97 porshento di obispado merikano a koperá pa kompilá informashon pa e investigashon di John Jay, e komishon irlandes a bin topa ku porta será.

Na skol, internat i otro institutonan ku a investigá, a sali na kla ku hopi biaha a tapa e kasonan. Esei a pone ku den kompilashon di informashon no por a hasi nada otro sino di enfoká riba e gran kantidat di kaso ku a mèldu despues. I eseinan ta mas trabahoso pa husga.

Warda un tempu mas?
Na Irlanda a tarda sigur nuebe aña promé ku por a saka konklushon. Un espera asina largu lo ta èkstra doloroso pa e hendenan na Hulanda ku despues di a keda boka será durante di algun desenia, porfin a presentá nan storia na Wereldomroep, e korant hulandes NRC òf e organisashon hulandes katóliko yamá 'Ayudo i derecho'.

Pero si wak kontenido di e kasonan, e situashon na Hulanda parse esun na Irlanda mas ku esun na Merka. Aki tambe ta trata hopi biá di instanshanan será. Pa laga e instanshanan ei revelá nan sekreto mester di un mandato sólido. Polítika por duna esei. Serka obispu van Luyn mas bien ta su bon intenshonnan ta konta.

Den e dianan akí Iglesia Katóliko hulandes ta prominentemente den notisia ku relatonan tokante abuzu seksual. Wereldomroep i NRC Handelsblad a investigá nan.
Siman ku a pasa so kaba a mèldu reim 200 kaso. Algun reakshon anónimo ku Wereldomroep a risibí, a pidi atenshon pa posibel kaso di abuzu seksual na skol i internatnan di Iglesia Katóliko na Sürnam i na Antia i Aruba.

Si bo sa di hende ku a eksperenshá abuzu seksual di Iglesia Katóliko, òf bo mes tin e eksperensha ei, bo por manda un meil na <mailto:> Por meil nos libramente na papiamentu, nos lo atendé tur meil masha konfidenshal mes.