Ayera fundashon SPLIKA a selebra su di kuater lustro ku un resepshon na 'Antillenhuis' na Den Haag. Durante dje resepshon aki e arkeólogo di material ouditivo, Tim de Wolf a tene un presentashon riba produkshon di disko na Antia i Aruba despues di Segunda Guera Mundial.

Eskoho i dominio
Ruben Severina, presidente di SPLIKA, ta aklará e eskoho pa bini ku e charla di De Wolf. E presidente ta splika ku su fundashon no ta para solamente pa e idioma papiamentu, sino tambe pa e kultura. "Paso SPLIKA ta para pa Stimulá Papiamentu Literatura i Informashon riba Kultura di Antianan abou". Alabes e fundashon ta lucha pa siña prinsipalmente muchanan antiano bibá na Hulanda papiamentu. Severina ta di opinion ku dominio di papiamentu ta duna akseso na diferente idioma rònt mundu.

E kultura komo base
Entre otro músiko i papiamentista Carlos Prins ta splika ku si e base di kultura ta presente, esaki lo konta tantu lingwístika- komo musikalmente. Prins ta konta su mes eksperensianan ku e tin ora e ta traha músika. "Den e piesanan ku mi ta toka ku ta klásiko, tòg bo por rekonosé e ritmonan i e diferente elementonan latino i karibense".