E biá akí sí wenter no ta hasi wega. For di masha tempu Hulanda no a eksperenshá tantu dia asina ku sneu i eis i un temperatura bou di sero grado. No ta problema i molèster so tin. Porfin e soño di hopi hende a bira realidat.

Kore i lastra ku slei i asta ski bai skol òf trabou a bira posibel. E probabilidat di un Elfstedentocht, e kareda maratóniko riba eis natural, ta mas grandi ku nunka. Ya ta 40 aña pasá ku a hasi e gira glasial akí, atravesando 11 siudat den nòrt di Hulanda riba kanal i lagonan kongelá.

No ta Hulandesnan outóktono so ta pasa prèt riba eis. Afisionadonan hulandes karibense tambe ta gosa di e fenómeno akí di naturalesa na Tera Friu, saboriando un bon sòpi di bonchi pelá bèrdè òf panekuk ku stropi.

Reportero Patrick Dorder a bai en buska di Sürnam i Antiano ku ta kore skats. Frankamente e no a topa ku nan kasi, ku eksepshon di algun di e generashon nobo òf ku a kaba di yega Hulanda, i ku ta kurioso pa sa kon ta skats òf simplemente pa sinti e sensashon di move riba eis.

E reportahe di vidio di Patrick Dorder ta na ulandes.