Ank Bijleveld, sekretario di estado di Relashonnan den Reino i di Asuntunan interno di Hulanda no ta kontentu ku aktitut di Boneiru den e e reunion den kua a trata kambionan di struktura estatal.

Skibí pa Ronald A. Muyden

Por lo pronto Hulanda lo no pone sèn disponibel pa renovashon di hòspital, skol, pista di aterisahe i warda di polis. Bijleveld ke warda te ora ku pueblo di Boneiru vota na e referèndem, ku probablemente lo tuma lugá na mart.

"Afspraak' ta 'afspraak'. Bo no por kuestioná un eskoho ku bo a hasi huntu pasobra otronan tambe ta sufri e konsekuensianan", segun e mandatario hulandes.

Bijleveld ta haña ku Boneiru tin ku kumpli ku palabrashonnan hasí. Si no hasi esei, e konsekuensia ta lógiko ... ta stòp ayudo finansiero. Bijleveld: "Bonerianonan tin ku realisá kiko nan ta 'bezig' kun'é. Esei nos a skibi den nos karta pa nan".

PDB
Jopie Abraham, lider di PDB ta haña ku e karta di Ank Bijleveld ta un chantahe polítiko. Na promé lugá e palabrashonnan hasí na 2005 no tin nada di aber ku kambionan den reino. Sèn no ta tur kos. Abraham ta haña ku Hulanda ta purba influensiá e referèndem na mart di oro aña. E ta di opinion ku no ta su partido so ke un referèndem. Pueblo tin derecho riba esaki i lei internashonal ta sostené, segun e lider di PDB.

Dia 10 di òktober 2010 Boneiru tin ku bira munisipio ekstraordinario di Hulanda. E pregunta ta si Bonaire lo logra pone tur kos na òrdu p'é fecha aki, awor ku kosnan a stanka.