Hulanda i Boneiru a hasi bon ku otro i a sera pas polítiko firmando e Akuerdo Gubernamental tokante repartishon di tarea i koperashon despues di 10-10-10. Ku e akuerdo akí a keda konfirmá atrobe ku Boneiru lo bira un munisipio spesial di Hulanda despues di desmantelashon di Antia hulandes.

Anteriormente Saba i Sint Eustatius a firma un akuerdo asina. Henk Kamp, komisario di islanan BES, a remplasá sekretario di estado Ank Bijleveld na momento di firma e akuerdo ya ku e mandatario femenino no por a bula. Diputado Jopie Abraham di struktura estatal di Boneiru a firma na nòmber di e isla.

Ku firmamentu di e akuerdo Hulanda ta reanudá saneamentu di debe i invershon den entre otro kuido di salú, enseñansa, aeropuerto i seguridat na Boneiru. A suspendé saneamentu di debe i invershonnan aña pasá pasó bestürskolezje tabata nenga di papia tokante konkretisashon di e palabrashonnan hasí, tanten ku no a tene un referèndem. Por lo pronto lo no tene un referèndem debí na intervenshon di gobernadó Frits Goedgedrag.

Sentimentu miksto
Abraham a firma ku sentimentu miksto, te ainda e ta di opinion ku pueblo mester bisa kon e ta mira integrashon ku Hulanda. "Awor e kos akí ta na Nashonnan Uní." Por bisa ku Boneiru a hañ'é mané obligá ta firma pasó a kuminsá desmantelá Antia. "Hopi servisio di gobièrnu sentral a pasa kaba pa Kòrsou i Sint Maarten." Pero te ainda Abraham ke organisá un referèndem.

Ta asina tambe ku parlamentu hulandes a aseptá e legislashon pa un gran parti i a mand'é awor pa senado na Hulanda. Gobièrnu di Boneiru ta spera ku firmando e akuerdo, e ta evitá ku lo surgi un impase òf asta anarkia pa motibu di un bashí gubernamental. Abraham ta haña partisipashon den legislashon i plannan di maneho un punto importante di e akuerdo. "Nos por nombra nos mes representante na Hulanda."

Limitá kresementu di poblashon
Boneiru por protestá tambe kontra legislashon ku Hulanda ta formulá. "A palabrá un prosedura pa esei. Nos por apelá serka Konseho di Estado." E isla por limitá tambe e fluho di hulandes oropeo.'No pasó nan no ta bon biní, pero nos ke pa poblashon krese di un manera kontrolá", asina Abraham a bisa. "No ta tur peliger a pasa. Pero a saka basta shinishi for di laira. Nos por bula!"

Skucha un entrevista na hulandes di Rene Roodheuvel ku Jopie Abraham