Hulanda lo yuda Aruba buska un partner òf kumpradó rònt mundu pa refineria Valero. Ayera promé minister Mike Eman di Aruba a palabrá esaki ku sekretario di estado Ank Bijleveld di Relashonnan di Reino. Mañan Aruba, Kòrsou i munisipio di Den Haag ta firma un akuèrdo di koperashon riba tereno di gobernashon hurídiko, sosial i kultural. E interkambio akí lo benefisiá tur tres partner, segun Mike Eman.
 

Apénas algun ora despues di su yegada na Hulanda, promé minister Mike Eman tabatin un enkuentro ku sekretario di estado Ank Bijleveld. Den e enkuentro, ku a desaroyá den un ambiente sumamente positivo, a toka diferente tema ku ta regardá e koperashon entre Hulanda i Aruba.
 

Buelonan di KLM
Sekretario di estado Bijleveld a kuminsá ku felisitá promé minister Eman ku e logro grandi di reanudashon di e buelonan di KLM pa Aruba. Manera ta konosí, e kompania di aviashon di Reino ulandes a stòp di bula pa Aruba for di aña pasá. Entrante djaluna awor KLM lo reanudá su buelonan pa Aruba. Mike Eman a aseptá un invitashon ku KLM a ekstendé na su persona, asina ta ku e promé minister arubano ta un di e pasaheronan di onor riba e promé buelo aki di KLM pa Aruba.
Regreso di KLM tabata un meta firme ku gobièrnu di Aruba kier a logra, segun bosero Nicole Hoevertsz, alabes sekretario di Konseho di Minister.
 

Kumpradó pa Valero
Un tema importante ku a bin dilanti ta e akuerdo ku gobièrno di Aruba a logra resientemente ku refinería Valero i ku sekretario di estado Bijleveld ta konsiderá un resultado sumamente positivo. Di su parti el a sera un kompromiso pa yuda proaktivamente ku búskeda di posibilidatnan nobo i interesante pa e refinería na Aruba. Te awor ta tres interesado tin pa e refineria arubano: China, Brazil i Benesuela.
 

Plan di Kalamidat
Den lus di e akontesimentonan na Haiti ta opvio kon importante ta pa un país disponé di un bon plan di akshon na momento di kalamidat. Fin di aña pasá kaba promé minister Mike Eman a pidi e sekretario di estado ulandes  pa duna Aruba asistensia riba e tereno aki, sobretodo ku yudansa di Raad voor de Veiligheid, e konseho di seguridat ulandes. Gobièrnu ulandes a bolbe bisa ku lo kumpli ku e kompromiso aki i ku pronto lo tuma pasonan konkreto den e direkshon ei.
 

Infrastruktura
Un biá mas a diskutí riba e fondonan di FDA i e deseo di gobièrno di Aruba pa invertí un parti mayoritario di esaki den mehorashon di infrastruktura di e isla. A yega na palabrashonnan konkreto tokante e prosedura ku lo sigui pa hasi e invershon aki posibel.
 

Trèm den Oranjestad
Bosero Nicole Hoevertsz ta splika tambe ku ademas di tur esaki, e bishita di trabou di promé minister Eman ta pa firma un akuèrdo di koperashon na Hulanda ku Kòrsou i gemeente Den Haag. Eman ta spera di probechá di e okashon pa negoshá tokante renovashon di Oranjestad i mehorashon di transporte públiko. E promé minister a menta e posibilidat di un tipo di konekshon di trèm ku ta atravesá sentro di Oranjestad.
 

Siguiente enkuentro
Fuera di e temanan aki a trata diferente otro aspekto di e relashon entre Hulanda i Aruba, kaminda ku sigur por konta ku apoyo di e mandatario ulandes. Promé minister Eman i Sekretario di estado Bijleveld a palabrá ku lo topa otro na inisio di febrüari, pa yega na un definishon spesífiko di e temanan ku lo trata konhuntamente.