'Arogante i neo-kolonial', asina senador Hans Hillen (CDA) ta deskribí e eksihensha di Tweede Kamer pa fiha aborto, eutanasia i matrimonio homoseksual den legislashon pa Islanan BES. Dia 9 di mart Parlamento ulandes a vota pa algun kambio di lei ku mester posibilitá esaki.

“E gran mayoria den parlamento ta wak su mes i su propio interesnan. No tin sufisiente atenshon pa e desaroyo delikado entre e islanan antiano i Hulanda.”, segun senador Hans Hillen.

Partido di oposishon boneriano UPB a skibi den un karta dirihí na Tweede Kamer ku mester duna BES mas tempu., meskos ku Hulanda tambe a tuma su tempu. Hillen ta di opinion ku dje forma akí Hulanda no ta asumí e posishon djun partner di konfiansa. “Mi por imaginámi e reakshon di UPB perfektamente. Loke Hulanda ta bisa awor ta: Nos ta moralmente superior na boso. Bosnan mester aseptá e leinan i deliberashon no ta posibel.
Palabrashon ta palabrashon
Den su karta pa Tweede Kamer Ramonsito Booi di UPB ta referí na e palabrashonnan hasí entre Hulanda i Islanan BES. “A palabrá ku porlopronto e leinan antiano ta keda vigente na BES. Despues lo introdusí legislashon ulandes gradualmente, pero sí den konsulta estrecho ku BES pa wak kiko ta mas adekuá.” E senador miembro di partido CDA ta bisa ku Hulanda mester mustra respetá kultura i karákter di Islanan BES. “Pero Hulanda ta demostrando ta ku e no tin kunes ku tur esei. loke ta un inisio malísimo di un futuro mutuo.”

Inaseptabel
Durante e debate sekretario di estado Bijleveld a trata di deskonsehá e amiendanan, pero e no a logra esei. Si aprobá e lei, di tur manera Bijleveld lo tin di firm'é, segun Hillen. “E or'ei e tin e deber di defendé e amiendanan, tantu den Eerste Kamer (Senado) komo pafó. E or'ei ta parse mané ta su mes proposishon di lei. Ni Bijleveld ni Tweede Kamer no mester deseá un kos asina, pero mi ta teme ku e kos akí lo sosodé tòg.”

Mas impase
Hillen tin miedu ku e ‘eksperimento’ lo karga un sèt di difikultat trese kune, ku no ta na nodi tampoko. “Asina'kí nos ta bai den direkshon di muchu mas impase, komo ku efektonan dje akuerdonan no ta influenshá e parti finansiero so. Hulanda mester a asumí un aktitut di reserva for djun prinsipio i e mester a laga e islanan mes regla nan kos mas tantu posibel tambe.”

Eerste Kamer
Hillen ta bisa ku te na ora parlamentu bai di akuerdo k' e lei, e mester den senado tambe. E ta kere ku kasi sigur Eerste Kamer lo kuestioná kalidat dje legislashon. E no ta kere ta bon ku esun pais ta fòrsa e otro. "No t'asina mester anda ku otro."

Segun Hillen loke ta resaltá tambe ta ku no tabatin niun deliberashon ku islanan BES. Parlamento hulandes ta ko-legislador i komo tal ta mará na kombenionan ku a sera. Por último Hillen a deklará di ta kurioso pa sa kiko senado hulandes ta disidí awó.