Na Amsterdam ta konmemorá tur aña dia 8 di desèmber e víktimanan dje asesinatonan di desèmber 1982 na Sürnam. Te ainda despues di 27 aña tin nesesidat pa konmemorá, segun Romeo Hoost. Diesinku oponente dje régimen militar na Sürnam a pèrdè nan bida e tempu ei.

Fotógrafo i periodista Romeo Hoost ta organisá e konmemorashon tur aña. E tempu ei e tabata sindikalista p'e sindikato Moederbond na Sürnam. E fecha di 8 di desèmber ta nifiká prinsipalmente ku for dje dia ei Hoost ta biba permanentemente na Hulanda. "E sindikatonan FNV i CNV i tambe Union Oropeo a konsehámi pa no regresá, te ora kos kambia i bin bon notisia. Pero e bon notisia no a bini nunka. Konsekuentemente mi mester a keda Hulanda."

Huida
Aparte di Romeo Hoost tabatin hopi mas Surnameño ku tabata sinti nan mes menasá despues dje asesinatonan di desèmber 1982. Surnameñonan studiá manera por ehèmpel dòkter, abogado i notario a disidí pa hui for dje pais, segun Hoost. No solamente pa Hulanda, pero tambe pa Antia i Aruba. "Despues di 1982 a bin un migrashon grandi atrobe di Sürnam pa Antia i Aruba. Nan a hui bai pa por biba un bida ketu einan."

Regreso
Por lo pronto Romeo Hoost lo no regresá Sürnam. Te ku dos aña pasá e tabatin un kaso den korte kontra èks lider militar Desi Bouterse. Ainda tin menasa pa su bida na su pais natal. Hoost: "Mi prinsipio ta ku lo mi bai bèk na momentu ku detené i sera Bouterse, despues ku konden'é. Te ainda e ta kana liber i ta menasá hende. Pero frankamente bisá, mi no tin miedu di Bouterse mes. Tin hende rondo di Bouterse ku ta mas peligroso."

E konmemorashon dje aña akí tin un nifikashon speshal, pasobra lo desvelá un monumentu na Sürnam na honor dje diesinku víktimanan dje asesinatonan di desèmber 1982. A pone e monumentu na e mésun sitio kaminda a tira nan mata na Fort Zeelandia.

Romeo Hoost den un entrevista ku Ronald Muyden