Un di kada 43 embaraso di mamanan afro-sürnam i afro-antiano na Den Haag ta bai kaba den morto di e yuchi. E beibinan ta fayesé djis promé, durante òf djis despues di nasementu.  Notisiero RTL na televishon ulandes a pasa e informe akí basá riba un investigashon di munisipio Den Haag i di GGD.

Serka mamanan hindú tambe tin muchu mas mucha ta muri ku e promedio: 1 di kada 65. E promedio nashonal ta 1 riba 100.
Na Hulanda dimes tin mas yuchi ta muri djis promé ku, durante i djis despues di nasementu kompará ku na otro pais oropeo. Mayoria biá ta beibinan ku a nase den barionan marginá.
 
Muchu lat serka partera
Kon bin ta nèt e damanan aki tin mas chèns di pèrdè nan yu i ki mishi Den Haag ku un mortalidat infantil haltu asina no ta kla ainda.
Un di e kousanan mas probabel ta ku muhénan afro-sürnam i afro-antiano ta akudí muchu lat serka partera. Band'i 47 porshento di e mamanan ku a pèrdè yu a bishitá partera despues di 14 siman numa di embaraso. Nòrmalmente ta kuminsá saminá for di momento ku un muhé tin dies siman ku barika anto ora e ta diesdos siman na estado, ta hasi e promé èho.
 
Djela Maduro di sentro di mama tineidjer, Mamasita a spanta mashá ora el a tende resultadonan di e investigashon: “Den mi ret di kontakto mi no konosé tipo di kasonan asina, asina ta ku mi tin idea ku ta trata di muhé ku no ta biba kaminda ta duna informashon al kaso. Nos mester wak pa alkansá e damanan aki ku informashon korekto pa nan opta korektamente”, asina Maduro a bisa na televishon den deklarashon pa notisiero RTL.
 
Prioridat máksimo
Minister Schippers di Salubridat Públiko ta konsiderá redukshon di mortalidat infantil komo prioridat máksimo.
“Na seis munisipio a start ku proyekto di prueba, entre otro ku konsulta pa esnan ku ke haña yu i un di tres èho, dirigí spesífikamente tambe riba muhé antiano i sürnam. A traha material di informashon tambe pa futuro mama i muhé ku ke haña yu tokante estilo di bida i riesgo pa salú. E investigashon di GGD Den Haag ta forma parti di e proyketonan aki", segun bosero di e minister.