Djárason mainta sink'or iglesianan na Antia i Aruba lo yena kan kan atrobe ku kreyente pa misa di ourora. Asina nan ta prepará pa selebrá nasementu di Hesus. Na Hulanda tambe tin e servisionan akí di misa, pa ser eksakto na Den Haag i Amsterdam. Aki si nan ta kuminsá un ora mas lat, teniendo kuenta ku hende ku ta dependé di transporte públiko. E aña akí e misanan di ourora na Den Haag ta tuma lugá pa di diesun biá.

"A pesar di e frialdat tur hende ta ansioso pa bai misa di ourora. For di novèmber nan ta kuminsá puntra: Tin misa di ourora e aña akí?"

Desiree Martina ta pilá di misa di e parokia antiano i arubano 'Yunan di Dios' na Den Haag. Segun Martina hende ta bin for di kasi tur siudat na Hulanda. For di Den Haag, Zoetermeer, Amsterdam, Rotterdam i Tilburg i te asta for di lugánan mas leu ainda. "Ta Antianonan ku no ta bai Antia pa dianan di fiesta i ku ta sinti falta di e kustumber akí."

Desiree Martina ta splika ku na Hulanda e misanan ta kuminsá seis'or enbes di sink'or, pa e bishitantenan por kue e promé trèm pa nan yega misa. Misanan di ourora ta algu típiko di Karibe i di Latinoamérika. Na Hulanda nan no konosé e servisio akí. "Ora nos bisa e Hulandesnan ku nos tin misa sink'or, nan ta keda wak nos k'un kara di: Ta kiko esaki ta papia?" Nos ta splika nan ku nos ta hasi e sakrifisio akí, i aki na Hulanda ta dòbel sakrifisio, pasó nos tin ku sali den friu."

E kantidat di hende ku ta bishitá misa di ourora ta varia, segun Martina. "Tin biá tin kuarenta, tin bia sinkuenta hende. Ta dependé si tin hopi hende a bai Antia. Pero tin basta hende sí. Asta mucha, ku ta lanta tur mainta, nuebe dia largu te ku 24 di desèmber, pa bai misa ku nan mayornan".

Sakrifisio
Segun Desiree Martina, kreyentenan ku ta bishitá e misanan di ourora ta hasi un sakrifisio, pa bini huntu durante e nobena pa prepará nan mes pa e fiesta di Pasku di Nasementu. "Nos no ta prepará nos mes di pafó, pero di paden. I durante e nobena nos ta pidi Dios yuda nos prepará nos mes den nos kurason, kaminda Hesus mester nase." Pa Desiree Martina mes, e aña aki e misanan di ourora ta un sakrifisio èkstra. Pasó e pastor ku lo dirihi e misanan no ta biba na Den Haag. Pastor Bouwman ta biba na Voorschoten i e no por yega Den Haag na tempu ku transporte públiko. "Ta p'esei mi a ofresé pa bai busk'é tur e nuebe dianan."

Bishita importante
Djárason mainta promé minister di Antia, Emily de Jongh-Elhage di bishita na Hulanda pa entre otro e Konsierto di Reino, lo asistí na e promé misa di ourora na Den Haag. Despues di misa e ta biaha bèk pa Kòrsou.

Skucha Desiree Martina tokante misa di ourora