Ounke zomer ta leu ainda, preparashonnan pa Zomercarnaval 2010 ta den full swing. E aña aki tin mas grupo ku lugá. Esaki ta nifiká ku no ta tur grupo por djòin e marcha dia 31 di yüli próksimo na Rotterdam. Un desaroyo remarkabel si konsiderá ku ainda e krísis ekonómiko ta reina na Hulanda. Stichting Zomer Carnaval mes ta asombrá ku e aña aki mas grupo a registrá. Awor tin asta un 'wachtlijst'.
 
Mas ku sinkuenta grupo a inskribi
Segun Karel Willems, presidente di Stichting Zomercarnaval, ofishalmente 56 grupo a inskribí pa e marcha di verano próksimo. Tres grupo ta riba 'wachtlijst'. Esaki kemen ku tin 59 grupo a inskribí. "Esaki a sorpresá nos mes tambe, teniendo kuenta ku e situashon ekonómiko ku nos t'aden." E kantidat di 59 inskripshon no kemen ku tur e gruponan akí ta partisipá definitivamente. "Den e promé fase di inskripshon gruponan ta yena un formulario, den kual nan ta indiká ku nan tin intenshon di partisipá. Den e siguiente fase, pues ora nan haña informashon mas detayá di por ehemplo e gastunan, tin grupo ta kai afó. 'Un proseso natural.'
 
Stichting Zomercarnaval ta mantené un kantidat di 35 grupo. Esaki komo ku mester tene kuenta ku largura di e parada i e ruta ku tin ku kana den kayanan di Rotterdam. "E ruta no por bira muchu largu, pa e kabes ku e rabu no pega na otro. I loke ta importante tambe: nos presupuesto ta basá riba e kantidat di 35 grupo." Pero, asina Willems ta splika, eksperensha ta demostrá ku hopi grupo ta kai afó. E or'ei e gruponan ku ta riba lista di espera ta subi riba e lista i despues nan por partisipá.
 
Reina si of nò?
"Elekshon di reina di karnaval ta bira un problema grandi e aña akí. Tur aña nos tin ku lucha pa haña fondo pa organisá elekshon di reina. Pa e aña akí nos no tin un idea ainda kon esei ta bai sosodé." Pero, asina Willems ta sigurá, e ta bai tuma lugá sí. Kon e evento ta bai ta Willems no por bisa ainda. Esaki ta dependé kompletamente di e fondonan ku nan ta bai haña. "Kestion ku semper lo tin un reina di karnaval sí."