Minister Ernst Hirsch, minister hulandes demisionario di Hustisia, Asuntunan Interno i Relashonnan den Reino, ta spera ku parlamento i senado hulandes ta laga e proseso di legislashon pa desmantelá Antia hulandes sigui. E ta kere ku tin sosten amplio pa formashon di paisnan nobo Kòrsou i Sint Maarten.

Hirsch Ballin a bisa e kos akí na Aruba despues di fin di e enkuentro di kada mitar aña entre ministernan di Hustisia di e tres paisnan den Reino. E tema di desmantelashon a dominá e temanan koriente di hustisia. Esei a a keda komprobá ku presensia di diputadonan pa Asuntunan Konstitushonal di Sint Maarten i Kòrsou na e reunion.

Hirsch Ballin lo tin gana pa parlamento i senado hulandes ta dispuesto pa kaba di atendé ku legislashon di formashon di paisnan nobo Kòrsou i Sint Maarten dia 10-10-10. Pero e ta bisa ku hopi énfasis tambe ku naturalmente ta keda na parlamento pa disidí e kos akí.

E no ke duna boka ora puntr'é kiko e ta teme si e proseso di legislashon no sigui. 'Si bo realisá bo mes loke mi a mira delaster simannan i loke a a sosodé den e krísis polítiko ku lamentablemente a surgi na Hulanda, lo mi bisa: No laga nos fiha nos pensamentu riba e senarionan di mas malu, laga nos traha pa tur e loke ku sí nos por logra. Esei ta konta sigur pa e tereno di maneho di Relashonnan den Reino i Hustisia. No ta nan ta na rais di e krísis. Afortunadamente ámbos tema tin sosten amplio na Hulanda i den otro paisnan di Reino.

Konsenso amplio
Ta pa di dos biaha ku Hirsch Ballin tin e kartera di Asuntunan Antiano i Rubiano. E di promé biaha el a bini ku e plan pa dividí Antia den pais Islariba i Islabou. E ten ei e plan no a sigui. Hirsch Ballin ta di opinion ku si surgi retraso òf desmantelashon no sigui, ku esaki no tin nada di aber awor ku e plannan mes. E ta ripará ku tin konsenso amplio pa paisnan nobo Sint Maarten i Kòrsou i ta konfia ku esei ta tuma lugá, preferiblemente dia 10 di òktober próksimo.

Sint Maarten
Antisipando riba formashon di e paisnan nobo, diputadonan di Asuntunan Konstitushonal di Sint Maarten i Kòrsou tambe tabata presente na e deliberashon tripartite, pa aweró e transishon bai mas suave posibel. Pa William Marlin tabata su promé biaha ku el a representá Sint Maarten. E isla tin un parti franses i unu hulandes.

Si mester tin koperashon entre ámbos parti di e isla, esei mester sosodé via Den Haag i Paris.
Debí na esaki hopi biaha gobièrnu insular no ta bon na altura di loke a keda palabrá presisamente. Tabatin dos punto riba agènda di deliberashon tripartite di e tipo ei. Franses i Hulandesnan ke traha un prizòn nobo huntu. I nan ke un areglo pa ekstraditá sospechosonan. Marlin tabata ke klaridat tokante e dos puntonan akí pero e no a haña esei durante e enkuentro ku e tres ministernan di hustisia.

De Jong-Elhage
Promé minister Emily de Jongh -Elhage ta kontentu ku e punto di bista di minister Hirsch Ballin. E ta fortifik'é den su optimismo ku por logra 10-10-10 ainda. Pero e ta kouteloso tambe i e ta warda wak : 'Nos ta den man di parlamento hulandes.' De Jongh-Elhage ta sali for di e punto di bista ku en todo kaso e èks partidonan di koalishon CDA, PvdA i ChristenUnie ta respaldá e plan di desmantelashon te ainda: Nan a traha riba dje i no por bai kambia di ripente di idea.'