Mucha di koló tambe mester por identifiká nan mes ku un prensès i su prens den un kuenta di ada. Ta p'esei eskritor i kontadó di kuenta, Hilli Arduin a skibi 'Prinses Ivana, het prinsesje dat haar haren niet wilde kammen'. Un kuenta di maravia ku protagonista di koló, den persona di prensès Ivana i prens Mandela. E siman akí e buki lo sali riba merkado.

E kuenta ta deskribí bida di un prinsesa imaginario i di koló, mashá bunita mes yamá Ivana. Pero un kos sí: e no tabata gusta peña kabei. Prensès Ivana tabata ninga redondamente, pone su mayornan desesperá, te dia ku el a namorá di prens Mandela. E prinsesa a gusta kon e prens ta peña su kabei estilo gueni, o sea tur na flègtu. Esaki a motiv'é pa kuminsá peña kabei atrobe.

Identifikashon
Loke ta asina speshal di Ivana, segun outor Hilli Arduin, ta ku 'tur mucha muhé di koló, tur mucha muhé afro, por identifiká su mes ku prensès Ivana i demas personahe den e buki.' Arduin ta splika ku situashon den kuentanan di ada, manera Doornroosje, Sneeuwitje k'eseinan, no ta kuenta ku mucha afro karibense por rekonosé nan mes den nan, 'tin muchu tiki buki riba merkado oropeo, unda nos muchanan por rekonosé nan mes aden ku e personahe òf situashon.' Kuminda, baliamentu i demas kustumber ta diferente, asina Arduin ta konta. E ta agregá ku ni buki tokante mucha na Afrika no ta rekonosibel pa mucha karibense. Esei no ta nifiká ku e buki di Arduin ta pa much'i koló so, 'e ta un kuenta bunita pa tur mucha.'

Insiprashon
Hubentut i e manera ku su mayornan a lant'é, a inspirá Arduin pa skibi e buki. 'Nunka mi mama no a yama mi kabei mal kabei, semper e tabata bisa ku mi kabei ta bunita, semper mi mayornan a apoyá nos'. Fuera di esei e kier a skibi djun mucha muhé no komun i koriente, kontrario na tur su otro obranan pa mucha. Ta p'esei el a skohe pa un prinsesa i su prens, pa mucha siña aspirá i ambishoná mas den bida.

Hilli Arduin ta konvensí tambe ku e aktividatnan i afishonnan di awendia, manera wega riba kòmpiuter i smartphone, no ta stroba mucha di soña ku prens òf prensès, ni di realisá nan soño.