Hulanda mester goberná Sint Maarten temporalmente, si sali na kla for di investigashon ku 'enberdat ta mafia ta goberná' na e isla. Hero Brinkman di Partij voor de Vrijheid (PVV) ta bisa esaki. E partido a bira di biaha e di dos partido di Hulanda durante elekshon oropeo. Hero Brinkman ku tin Asuntunan Antiano i Arubano den su kartera ta insistí pa basta aña riba e nesesidat pa bon gobernashon na e islanan i ta kulpa polítikonan lokal di korupshon. Pero e imáhen ku tin di PVV ku e ta un partido blanku no ta klòp, segun Brinkman.

Segun e parlamentario hulandes tin bastante interes pa su partido den komunidat antiano i surnameño."Na Rotterdam durante nos delaster enkuentro mi tabatin hopi kombersashon ku simpatisadónan di PVV, entre nan un gran kantidat di antiano i surnameño. Nan ta sumamente interesá den nos punto di bista."

Brinkman ta haña e idea ku su partido ta 'kontra estranhero' totalmente inventá. "Nos tin un punto di bista kompletamente evidente pa loke ta trata imigrashon i integrashon. Pero esei no ta nifiká ku nos ta awor kontra tur hende ku ta aki. Esnan ku ke permanesé legal i ta tene nan mes na nos reglanan i kultura ta bon biní i por keda."

E ta bisa ku ta kompletamente ridíkulo ku antiano i arubano por a vota siman pasá pa elekshon oropeo. Pió ainda pasobra antianonan na Hulanda no tin mag di vota pa nan propio konseho insular. Brinkman no ta mira komo problema ku den e kaso ei, komunidat antiano i arubano na Hulanda lo ta un porsentahe mashá grandi dje elektorado total.

"Si ta asina ku nan ta forma e parti di poblashon ku sa un tiki kon un gobièrnu relativamente íntegro mester funshoná i kon demokrasia ta traha. Pues lo ta bon so kaba ku sí nan por vota."

Palabrashon fuerte
E parlamentario ta mashá na fabor dje plan di sekretario di estado Bijleveld pa investigá e kalidat di gobernashon na Aruba. Siman pasá PVV a entregá un moshon pa laga hasi un investigashon similar na Kòrsou i Sint Maarten. Brinkman ke duna e sekretario di estado espasio di tempu di un aña pa e investigashon, basta yega na palabrashonnan konkretu tokante e término. Por lo demas PVV tin tiki ilushon tokante resultado di un investigashon asina.

"Mi ta kasi sigur ku mafia ta goberná na Sint Maarten", segun Brinkman. "Si un investigashon proba esei, e ora ei Hulanda mester ta shen porshentu sigur ku ta gasta e plaka di saniamentu di debe bon. Pa mi parti nos goberná Sint Maarten temporalmente pa sòru lihé pa elekshonnan demokrátiko, ku hende riba lista elektoral ku no a haña sentensia i ku no tin laso ku mafia."

E parlamentario pa PVV ta mantené algun tempu kaba un notifikashon riba énternèt tokante korupshon na e islanan. Brinkman ta bisa ku ya kaba el a risibí mas o ménos binti tep usabel. "Mi ta investigá tur kos ku drenta i algun a kondusí na pregunta den parlamentu."Mi no por proba tur kos, pero algun notifikashon ta konfirmá. Lo mi presentá esakinan na minister. Korupshon ta bira solamente mas pió, pues semper lo mi pone e tópiko ei riba agènda."