Helmin Wiels di partido Pueblo Soberano na Kòrsou a kaba di yega Hulanda. Su partido ta den oposishon i ta boga kétubai pa un Kòrsou independiente. Wiels ta haña ku pueblo Antiano na Hulanda no ta bon informá di e kambionan ku ta bai tuma lugá na 10 -10 -10.

Ayera e delegashon parlamentario ofisial a sali pa tera friu.
E delegashon aki ta konsistí di mr. Faroe Metry (PNP), drs. Glenn Sulvaran (PAR) i Eunice Eisden (MAN).
Esnan ku ta forma parti di e delegashon pa e otro islanan ta Ramonsito Booi pa Boneiru, Will Johnson pa Saba, Reginald Zaandam pa St. Eustatius i Rudolphe Samuel pa St. Maarten.  

A palabrá tambe ku e respektivo diputadonan di struktura estatal di Kòrsou i St. Maarten, Zita Jesus-Leito i William Marlin tambe lo forma parti di e delegashon.

Ta konosí entretantu, ku ni partido Forsa Kòrsou, ni Pueblo Soberano ni tampoko Niun Paso Atras lo forma parti di e delegashon ofisial ku ta bai Ulanda pa papia riba e leinan di konsenso ku Tweede Kamer mester atendé otro siman. 'Nos no ta bai pa motibu di prinsipio', asina nan a informá Komishon Sentral anteriormente.

Amienda sí, voto nò
Pedro Atacho, presidente di parlamentu a anunsiá kaba, ku komo delegado spesial, e parlamentario di Antia lo no tin derechi di voto.
Segun Atacho, e delegashon parlamentario por intervení, e por entregá un amienda si e ta deseá esei, pero e no por vota.
Hustamente esaki a pone Helmin Wiels, lider di Pueblo Soberano puntra ki sentido tin pa e delegashon parlamentario bai Ulanda bai sinta tende kiko Ulanda ta disidí.

Na su yegada na Hulanda Wiels a bisa, ku na promé lugá sú delegashon a biaha riba su mes gastu, no riba plaka di pueblo, esaki pa konsiderashon ku pagadó di belásten.
E i su komitiva tei na Hulanda komo opservador, pa tuma nota di e debate den parlamento hulandes, kaminda lo trata kambio di Statüt. E no ta lamentá ku e no por tuma parti aktivamente na e debate, pasó tòg no por bisa nada, ta skucha so ta skucha e islanan den Tweede Kamer.

Enkuentronan informativo
E motibu paskiko e ta haña asina importante pa informá Antiano di e desaroyonan pa desmantelá Antia ta pasó komunidat antiano na Hulanda ta ignorá òf no ta komprondé reperkushon di e kambionan ku ta bai tin ku introdukshon dje leinan di konsenso di Reino. E intenshon ta pa tene un seri di charla pa splika konsekuensha di e kambionan estatal, kuminsando mañan, 9 di aprel na Den Haag pa bai kaba den kareda di otro siman.

Aña pasá 52% di pueblo di Kòrsou a vota pro kambionan estatal den e referèndem, miéntras ku 48% a vota kontra. Un diferensha di 4%, ku den bista di Wiels ta prueba ku pueblo ta dividí na mitar. 'Un diferensha ku no por pasa por alto, kos ku ta konta rònt mundu', asina el a splika. Despues di e kambionan, no ta bai tin statüt mas. "Sin statüt Hulanda por intervení ki ora k'e ke sin ningun preteksto, pa mete den asuntunan dje islanan."

Tráfiko di persona
E kabesante di partido Pueblo Soberano a motivá su biahe pa Hulanda bisando ku 'nos hendenan akinan a pidi p'e informashon ei, mi trabou ta pa mi duna e infomashon ei, konstantemente ta hasi pregunta, tin un falta enorme di informashon. Nos a bin ku sufisiente dokumento na un idioma fásil, simpel pa tur hende komprondé.'

Helmin Wiels ta sigui splika ku un kantidat di hende ta bai bèk Antia; hendenan kansá di persekushon i diskriminashon na Hulanda. E hendenan aki mester komprondé e kambionan estatal ku ta bai bin. Un di nan ta e asuntu di islanan BES, ku lo trese perturbashon di tráfiko liber entre e islanan, komo ku nan ta bira munisipio ekstraordinario di Hulanda. "Bo no por drenta Boneiru, ni Saba i Sint Eustatius mané bo ke mas, si bo ta bin di Kòrsou òf Sint Maarten", segun Wiels.