En bista di e riesgo di un gobièrnu derechista hulandes, Glenn Helberg, presidente di e organisashon ku ta sali na interes di antiano i rubiano na Hulanda OCaN*, ta urgi antiano i rubiano pa bai vota. Helberg ta teme ku posishon di derecho di antiano i rubiano ta na peliger ku un gabinete di derecha.

E presidente di OCAN a hasi su yamada despues ku kandidato pa elekshon parlamentario John Leerdam (PvdA), Cynthia Ortega Martijn (ChristenUnie) i Nadya van Putten a bisa siman pasá den un debate di Wereldomroep ku antiano i rubiano tin hopi di pèrdè ku un gabiniete derechista. Helberg ta teme tambe ku un gabinete asina por tin su konsekuensia pa restrukturashon di Antia entrante 10-10-10.

'E gabinete demisionario sa ku ta masha importante pa kaba ku e trabou.' (esta e trabou relashoná ku restrukturashon di Antia-red). 'Dia 9 di yüni e trabou akí no a kaba. Despues di 9 di yüni otro gobièrnu ta bai sinta i nan tin e poder pa kambia kos.' Fuera di esei Helberg ta konvensí ku porehèmpel e lei di tráfiko di persona den Reino ta bira algu ku 'nos hendenan mester bringa hopi bon p'e pa e no sali na malu pa nos.' Tratamentu di e lei ei ta na nivel di gobièrnu di Reino.'Si bini un gobièrnu di derecha 'e deliberashonan tokante tráfiko di persona ta bira hopi pisá mes.'

Bai vota
"Si nos ke pa nos derechonan keda respetá nos mester uza nos bos.' Segun Helberg tin hende ta keda sin bai vota komo protesta.'Pero aworaki no tin voto di protesta. Awor aki sí ta vota mester bai vota.' Helberg ta atmití ku e tin un preferensia pa un voto pa iskierda. 'Nos mester vota pa solidaridat den nos komunidat.'

*OCaN Overlegorgaan Caribische Nederlanders

Skucha Belkis Osepa den un entrevista ku Glenn Helberg