Deterioro progresivo
Na kuminsamentu di e relashon, Daantje a ignorá e ‘señalnan di atvertensia’ pa e por ‘tin un hende hòmber den kas’ i pasobra ‘e añanan no ta sinta warda riba bo’.
“E tabata yuda bon den kushina. Asta e tabata kushiná regularmente. Dos biaha pa siman e tabata dueila kas tambe: niun hende no tabatin mag di drenta kas ku sapatu sushi.” Semper e hòmber a trata su yu bon sí, aunke despues di e divorsio tur ora e tabata usa e areglo di bishita komo èksküs pa bin bishitá kas sin avisá.
Daantje a ripará sí ku su partner tabatin ‘un relashon hopi malu ku su rumannan i su mama’ – pero e no a para ketu mashá na esei. “Despues el a kuminsá kik sin fin ku mi tabata ‘papia muchu na telefòn’. El a kuminsá ta listra den mi agènda tambe anto kore pasa ‘pa kasualidat’ ora mi tabatin un sita òf presentashon un kaminda’.”
“El a kuminsá sigui mi unda ku mi bai i tabatin bes ku el a bati hende hòmber ku el a mira mi ta papia kuné. E tabata asta paga hende ku tabata biba den mi bario pa nan yam’é kont’é di mi moveshonnan. Yalusamentu ta venená un relashon i ta pone ku bo ke poseé e muhé meskos ku bo ta poseé un opheto.”
“Asina ku un hòmber introdusí violensia den un relashon, e hende muhé tin ku buska manera di bula afó. Tur hende muhé meresé algu mihó, pasobra niun muhé no ta kreá pa su partner maltrat’é.”
Erna Daantje (54) ta papia di eksperensia propio. Diesocho aña pasá el a hisa su yu di un aña i mei i bai laga e hòmber ku tabata maltrat’é emoshonal-, verbal- i na un dado momento físikamente tambe. Mirando atras, Daantje ta satisfecho tokante e sakrifisio- i esfuersonan ku e tabatin ku hasi e tempu ayá.
‘Shete paso atras’
“Klaro ku no tabata fásil. Tabata manera kos ku m’a bai shete paso atras finansieramente. Pero mi tabata dispuesto di lucha duru pa logra un bida digno pa mi mes i mi yu.”
Despues di añanan di soportá ku pasenshi, Daantje a prepará su baída ketu ketu pa lunanan largu. “Sin ku tabata riparabel, m’a hiba mi paña- i sapatunan preferí na kas di mi mayornan. Entre tantu, m’a buska te haña un kas rasonabel i a finansi’é ku un hipotek di binti aña.” Tabatin ‘hopi kos leuk ku e mester a laga para’, pero e mama hóben akí tabata dispuesto di paga e preis ei.
Por ehèmpel, e ta kòrda ku den kuminsamentu mobilario di su kas a konsistí di solamente un stof, un televishon chikitu i un kama di dos persona. “Ami ku mi yu hòmber chikitu tabata drumi huntu riba e kama ei. Masha propiedat material mi no tabatin. Pero loke sí mi tabatin tabata trankilidat i un vishon positivo di futuro.”
Un bista mas amplio
Daantje su ‘kuriosidat positivo’ i e echo ku e tabata trahadó sosial a yud’é hopi pa evaluá su mes situashon kabes friu. Su gana di siña a impuls’é tambe pa sigui krese komo persona. “M’a lesa tokante mi problemátika i a papia den mi sírkulonan sosial pa desaroyá un bista mas amplio di kiko ta un relashon sano.”
E kresementu personal na su turno a stimulá Daantje su apetit profeshonal, i asina ta ku el a bai Hulanda komo mama soltero pa studia mas leu riba su tereno. Anto ku éksito tambe: e tabata un di e 12 kursistanan, di 32 ku tabatin den su aña di estudio, ku a optené nan diploma di HBO Maatschappelijk Werk- en Dienstverlening sin niun retraso. Promé ku Daantje a bolbe Kòrsou, el a sigui algun kurso adishonal tambe.
Grave
Daantje ta konsehá hende muhé pa, si nan ripará ku un hende hòmber tin un karakter intrankil òf iritabel, nan no pasa leve riba esei. Puntra bo mes di bèrdat si bo ke ta den un relashon ku un hende hòmber ku no ta biba na bon ku su rumannan i su mayornan – prinsipalmente ku su mama. Kon e ta trata hende den tráfiko? E ta buska moda di hala bo for di bo amigunan na manera fini?
“Kosnan asina no por bisa bo sigur kon un hende hòmber ta bai komport’é den futuro, pero nan ta indikashon sí. Si e no buska yudansa profeshonal i kooperá konsistentemente ku e relashon, ta mihó kibra e relashon mas pronto posibel. Bai pa loke bo ta deseá di bèrdat sin wak patras: kaminda tin boluntat, tin solushon.”
Email this Article
Printer-friendly version
Mita masha de acuerdo ku bo Erna, semper mi ta admirabo pasobra bo ta un muhe ku a defende su dignidat i no a laga niun hende abusa di bo, mara tur muhe por siña di bo ejempel
Mi ta di akuerdo ku senjora Daantje
Si mentalmente bo no ta fuerte e situashon lo no kambia. Mester tin e kurashi pa bo por tuma e desishon kaba ku e relashon i sigui pa dilanti.E desishon tin ku sali dibo i di kurason.
Mi ta eens ku senjora Daantje. E kos ta kurashi, si bo ke sali foi di e situashon. Bo mester durf den bida, no den e kosnan ei so pero den bida in het algemeen. Defende bo mes. Den e kaso aki sigur vooral pa bo yu (nan). Paso ami ta di opinion ku e ta kumisa na belediging, despues e ta sigi na un klap riba chanchan i sigi bai verder. I si bo no stop`e of stel bo mes in veiligheid, e ta sigi. I nos hende muhe nan mester sinja bisa nó of laga nos nó ta nó nos si ta si, i no bolbe bek ne situashon si bo a kore bai foi e situatie. Senjora Daantje sigi ku e bon trabou. Groetjes Mazeiska
Pabien Erna ku e kurashi ku bo a i ta demostrando.
Esaki mester ta un ehempel pa tur Muhe por tuma pa duna balor na nan mes i asina jega na evita kasonan lamentabel ku praktikamente tur famia na Korsow a konose na algun momento.
Mi ta kompletamente di akuerdo ku señora Daantje. Un hende muhe tin ku siña stima su mes i realisa ku su felisdat no nesesariamente ta depende di un hende homber so, pero ku e mes por traha na su propio felisidat tambe.
Hopi biaha si un hende muhe logra sali foi un relashon destruktivo asina e ta sali komo un hende muher ku un balor propio(self-esteem)hopi abou, i ku tin biaha ta dura añanan pa e por yega na su balor propio na un nivel normal.
Un hende muhe mentalmente independiente tin biaha tin mas kurashi pa sali foi un relashon destruktivo. Si bo ta mentalmente dependiente di un hende homber, ni si bo tin moda finansiero lo bo no tuma e desishon pa sali foi e relashon ey.
Informashonan asina'ki siguramente ta stimula un hende muhe pa "wake up" na tempu pa e salba su bida i proteha su yu(nan) di tin un futuro troumatisá.
Post new comment