Hans van Mierlo tabata un demókrata di pura sepa, asina Hubert Fermina, èks parlamentario pa D66 ta deskribí fundador di su partido, kende a bai sosegá na edat di 78 aña. Van Mierlo semper tabatin artíkulo 1 di konstitushon na pechu. Igualdat di tur hende i prohibishon di diskriminashon tabata sagrado p'e. E tabata un palu di hòmber, úniko den su sorto.

Hubert Fermina a spanta ora el a tende di fayesementu di van Mierlo. 'Mi a spanta pasó te ainda pa mi Hans ta un palu di hòmber, úniko den su sorto. M'a pensa ta kon por ta? Siendo ku mi tabata sa ku e tabata malu. Pero ora mi a tende e notisia, tòg e kos a dal mi'.

Papia kla
Fermina semper tabata skucha van Mierlo ku masha atenshon ora e tabata papia. 'E por a splika e kos mas difísil na un manera masha simpel mes. Hopi biaha polítikonan ta uza masha palabra mes pa splika algu. Pero van Mierlo tabata papia kla.

E no tabata tene distansha di hende. Segun Fermina, van Mierlo tabatin un forma masha dirèkt di komuniká ku hende. Ta asina tambe el a atendé ku Fermina tempu ku nan dos tabata den parlamento hulandes pa D66. Asta tabata asina ku van Mierlo tabata duna Fermina asina tantu espasio ku e tabata puntra su mes: Mi Dios, ta kon bin mi meresé e kos akí? Pero e lider no tabata hasi distinshon entre su parlamentarionan.

Artíkulo 1
Na opinion di Fermina, van Mierlo tabata un demókrata di pura sepa. 'E tabata un hende sinsero ku di kurason tabata kontra tur sorto di forma di diskrimnashon. Den su pensamentu tur hende tabatin derecho di hiba su bida. E tabatin e puntonan di salida di artíkulo 1 di konstitushon mashá na pechu mes.

Na su pareser tur hende ta igual, sea ku nan ta homoseksual, hende muhé, enfermo, o físikamente desabilitá. 'Segun Fermina, Van Mierlo no solamente tabatin rèspèt pa tur hende, pero tambe el a praktiká e rèspèt ku tantu el a boga p'e.