Tamaño di dos kancha di futbòl yen di santu, pieda, restu di heru i plèstik. Ta asina grandi e kaminda di basha shushi ilegal a para bira. Dia aden dia afó trùk yen di shushi ta kore bai bini. Henter e bario ta na altura ma niun hende no ke pleitu ku e habitante ku ta hür e tereno.

“Un dia m’a purba papia kuné ma el a rabia mashá. For di e dia ei má lag’é na pas numa”, asina Juny, un habitante prekupá di Seru Fortuna, ku ta preferá pa no menta su nòmber berdadero, ta konta. “Ya tin mas ku un aña ku e kos aki ta tuma lugá pero tur hende tin miedu ti tuma akshon. E hòmber ta terorisá e bario. Ora e rabia e ta hasi kos straño.”

E lugá di basha shushi ilegal ta e tereno djis patras di klup di futbòl Hubentut Fortuna. Ofishalmente e intenshon di e tereno ta pa agrikultura òf krio di bestia i añanan e tabata di hür ku un persona ku en berdat tabata usa e tereno p’esaki. Despues ku e persona aki a fayesé un famia di dje a tum’e ofer. For di e tempu ei ta basha tur sorto di shushi riba e tereno.

Tòg via un tep anónimo sinku luna pasá a pone departamentu di medio ambiente di SSK na altura di e asuntu aki. “E hürdó aktual a hasi e kos su propio negoshi’, hefe di servisio suplente Cornelis Jansen di SKS ta splika. Trùk ku ke basha restu di demolishon aki, por akudí pa hopi menos plaka ku na Landfill.”

Prosedura kompliká
SKA entretantu a bai wak na e lokashon pero nan ta mará na man i pia pa falta di e ‘Lei di Promoshon di Orden Públiko i Protekshon di Komunidat’ ku for di 10-10-’10 no ta na vigor mas. “Pa falta di legislashon nos no por aktuá mes ora’, Jansen ta bisa. “Ta pesei aktualmente e kaso ta na Domeinbeheer.

Domeinbeheer a laga sa ku for di djabièrnè pasá nan ta na altura di e situashon na Seru Fortuna. “E kòntròl di tereno den e área lo tuma lugá e siman aki mes. Despues nos lo notifiká e hürdo ku e mester usa e tereno konformé e destinashon i a pidié limpia e tereno. Si esaki no sosodé, por kita e tereno bèk foí dje.”

Sistema slo
Juny ta kontentu ku e desaroyo aki, ounke na su idea a dura muchu largu promé ku a tuma akshon. Asina nos komo habitante di bario ta víktima di e sistema slo. E lugá di basha shushi ta bira mas grandi dia pa dia. Mi ta spera ku awor si e asunta ta keda kla lihe.”