Na nan yegada, e lidernan di frakshon di Tweede Kamer ku lo yega Saba djasabra 15 di òktober lo topa un multitut di hende razu pará ku pankarta den man. Un aña despues di e kambionan konstitushonal, awor si e kana a yena, na opinion di Juliet Johnson kende ta inisiadó e akshon.

“Shet’or nos lo t’ei na bòshi pará na aeropuerto. Nos lo protestá kontra tur e kosnan ku a bai atras den e aña ku tin tras di lomba”, Johnson a bisa, “manera salubridat i enseñansa, pero tambe e preisnan den supermerkado.”

Esun último akí ta esun ku mas ta toka Johnson personalmente. Pa mas di binti aña kaba e ta doño di My Store Supermarket, un di e tiendanan di mas konosí riba e isla. “E último aña akí, tin belasting tantu riba karga komo riba importashon. Esaki a trese kuné un oumento di 6 porshento, miéntras ku suèldonan sí a keda meskos.”

‘Nos kultura ta para kaba’
Johnson ta rabiá tokante e promesanan ku segun e no a keda kumplí. “A bisa ku lo tin mihó kuido di salú, pero e úniko kos ku ami ta mira ta ku mas i mas nos kultura ta para kaba, anto kultura hulandes ta bini na su lugá. Na lugá di nos propio idealnan, ta bini esnan di un pais ku ta pretendé di konosé nos isla mihó ku nos mes ku a biba aki henter nos bida.”

E doño di supermerkado a disidí di kue e toro na su kachu. Via Facebook e ta konvokando tur habitante di Saba pa uni kuné. E kantidat di reakshonnan risibí ta mustra segun Johnson ku di bèrdat Sabanonan no ta tuma mas. “E echo ku nos lo subi kaya mañan ta hopi spesial. Ta promé biaha den historia ku lo tene un protesta riba e isla. Generalmente, hende di Saba tin miedu di papia, pero asin’akí sí no por sigui.”

Spera ku lo bini kambio
Mèrdia despues di e akshon di protesta na aeropuerto, pueblo di Saba lo bolbe topa e lidernan di frakshon Hulandes, kendenan ta biaha huntu un biaha kada dos aña i e biaha akí pa èks Antia Hulandes. “Diferente orador lo haña oportunidat di trese nan puntonan padilanti den presentashonnan di sinku minüt kada un”, Johnson ta splika. “Dokter Joka Blaauboer lo papia riba salubridat, Nadine Granger, dosente di hulandes, lo papia riba enseñansa, i Chris Meijvogel tokante e mal kondishonnan laboral riba nos isla.”

Ku e protestanan akí, Johnson ta spera di habri wowo di e lidernan di frakshon. “Nos ke mira e mihó kuido di salú ku a primintí nos aña pasá. Tin ku hasi algu ku e sistema fiskal i subi nivel di enseñansa. Nos ta spera ku e lidernan di frakshon lo tuma e señal akí na serio.”