Nos sa tiki di otro. Esei ta e konklushon mas importante dje debate entre hóbennan kurasoleño organisá pa Wereldomroep na Den Haag. Si nos ke tin lei ku otro den Reino, nos mester respetá otro i mustra interes den otro. Tambe mester tuma lugá un kambio di mentalidat, segun algun partisipante na e debate.

A tene e debate den kuadro dje kambionan estatal benidero i dia 3 di desèmber lo transmití esaki na Kòrsou via di Radio Hoyer i TeleCuracao. Despues lo sigui un di dos debate na Kòrsou.

Yunan di Kòrsou i Hulandesnan tin difikultat pa anda ku otro, asina Vicky Trinidad, mentor di Fundashon pa Fiansa di Estudio Kòrsou (SSC) a bisa. E mentalidat di tur dos banda ta e problema di mas grandi, asina e ta kere. Pasobra nan no ta komprondé otro: 'Si bo no surpasá esei, bo no por pasa huntu dor di un porta."

Kantante Mega di K-Liber no ta di akuerdo ku esei: Ta bai mas i mas mihó. Si bo keda biba den pasado, nunka kos lo no drecha. Mi tin un bon sentimentu tokante esei, e ta bin." E mes ta mira su mes komo un hende, un kosmopolita i koló no ta al kaso. "Mi no mester ta un hulandes pa por biba na Hulanda."

Garrick Nassy a apresiá e debate, pero tòg e tabata falta un poko direkshon. E ponensianan ta segun Nassy muchu amplio, manera: "Kòrsou ta pa Antiano i Hulanda pa Hulandes? Esei a tuma diferente direkshon, pasobra e definishon di 'Antiano' a keda habrí."

Direktor di Wereldomroep Jan Hoek ta haña ku partinan den Reino tin lei ku otro, pero por mihó. Hulandesnan i Antianonan no konosé otro masha bon. "Ku e debatenan akí nos ta purba kontribuí ku esei, ku nos ta papia ku otro." Rèspèt i skucha otro ta segun Hoek esenshal.

Parlamentario John Leerdam (PvdA) nasé na Kòrsou, ta haña e diskushon un ehèmpel pa tur Antiano i Hulandes. "E ta biba, esaki hende ta papia tokante di dje." Mester kita tur opstákulo denter di Reino. Esei el a bisa tambe den Tweede Kamer: "Mester bin un kambio. Si tin un sentimentu di superioridat, nos mester sòru pa kita esaki.

Dia 4 di desèmber por skucha e debate riba nos wèpsait.

Skucha un relato di Romeo Hoost.