"Mi ta hopi orgulloso ku e éksito di Dos Amor. Paso hendenan a bisámi no traha ku hóben antiano. Si bo ke pa bo proyekto bai bon, mihó traha ku otro grupo." Ku e palabranan aki Archell Thompson di Mikesa a ekspresá su legria después ku kasi binti hóben di grupo di teater Pasenshi a estrená e obra 'Dos Amor' na Almere. 'Dos Amor' ta trata temanan manera embaraso di mucha yòn i malunan venériko.

Darryl ta hunga e ròl di un hóben ku ta saka su amiga tiner na estado. Darryl mes tin dieshete aña i ta mira basta tata hóben rondó di dje. 'Un mucha hòmber di diesinku aña ta e delaster ku a bira tata awor akí.'  Darryl ta spera ku su amigunan ta bin bishitá e obra, pa nan siña pa no saka hende na estado, sigur si bo no tin sufisiente sèn.  

PSP i sapatu Nike
Marlyson ta e partisipante mas yòn na e obra i su papel ta e yu mas chiki di un famia ku a kaba di yega for di Kòrsou. Su personahe no ta kontentu ku nan a bini, pasó nan a keda mes pober. Ora e konta su tata ku tur su amigunan na skol tin sapatu Nike i wega di kompiuter PSP,  su tata ta splik'é ku nan no tin sèn p'e kosnan ei.  Marlyson ta komprondé e tata si, pero e ta haña sí ku tur mucha mester tin PSP i sapatu di marka. E tambe tin nan.

Nos a bira serio
Tyafanti  ta toka den un brassband i ta bai skol, i a partisipá ku hopi entusiasmo na  e obra aki. E ta spera ku lo sigui ku algu di teater asina akí den Almere. Den kuminsamentu e no tabata sa kiko e spera. Pa ta onesto e mes tambe ta haña ku den kuminsamentu nan no tabata masha serio. 'Pero ora nos mes a mira kon importante e kos aki tabata pa Archell, nos a bira serio.' El a hasi su esfuerso den su papel di e mama ku a kaba di yega for di Kòrsou ku su famia anto tur su famia i amiganan a bin wak e.
Grupo di teater Pasenshi ta un proyekto di Mikesa na Almere. Último funshon di 'Dos Amor' ta djabièrne awor promé di yüli.