Na Rotterdam lo duna guia adishonal na mas o ménos doshen bekado antiano, ku a bin studia Hulanda. Munisipio, skol di estudio avansá i Universidat Erasmo lo koperá ku organisashonnan antiano pa yuda e studiantenan akí.

E instansianan a lanta un plataforma konhuntamente: PAAR (Platform studerende Antilliaanse en Arubaanse Rotterdammers). Marja Bakker di Hogeschool Rotterdam ta bisa ku na e islanan ta difísil pa prepará bon pa studia i biba na Hulanda. Papia ulandes henter dia riba su mes kaba 'ta un impakto basta formal tòg' pa nan. E sistema di enseñansa na Hulanda ta rekerí muchu mas independensha di loke e studiantenan nobato a kustumbrá kuné na Kòrsou.

Hogeschool Rotterdam a kondusí un pilot kaba ku treinen, kaminda e studiante prinsipiante por a intensifiká dominio di ulandes i kapasidat pa studia. Fuera djesei nan lo risibí guia di un studiante ku eksperiensha i fe promé ku nan sali Kòrsou ta ofresé nan un preparashon ekstenso. E skol di estudio avansá ta ofresé e materia di opshon yamá 'studia na Hulanda' tambe, ku kual por skor un punto di estudio.
 

Bekado
E grupo nobo di studiante prosedente di Kòrsou i di Boneiru entretantu a yega airopuerto Schiphol ku dos buelo. SSC, esta Stichting Studiefinanciering Curaçao ta enkargá ku e siman di introdukshon. Marilyn Alcala-Wallé, diputado di enseñansa di Kòrsou a akogé nan na Schiphol. E gesto di bonbiní a kai mashá na agrado di e bekadonan.