Aruba a konosé un grandioso selebrashon di 'Dia di Hymno y Bandera'. Ounke áwaseru a kai pisá despues di un periodo basta largu di sekura, a selebrá e ku entusiasmo i masha müzik, spich i defilé di gruponan uniformá. Rufo Wever i Padú Lampe a komponé 'Aruba dushi tera' na kuminsamentu di aña sinkuenta. Lampe, ku awendia tin kasi nobenta aña, te ainda ta kanta e himno nashonal na bos haltu i di kurason. Promé minister di Antia Emily de Jongh-Elhage tambe tabata presente. E ta spera ku otro aña e lo por tei atrobe, pero e ora ei komo promé minister di pais Kòrsou.
Müzik ta parti esensial di un fiesta rubiano. I tabatin müzik de sobra: un banda di supladó, un koro, un solista i vários drùmbènt. Asina tabata toka un piesa rubiano, asta e dignitarionan mané gobernadó Frits Goedgedrag i su kolega Fredis Renfujol a kuminsá zoya riba e müzik.
Tempu ku Rufo Wever i Padú Lampe a komponé 'Aruba dushi tera', nan no tabatin idea ku e piesa lo a bira himno nashonal di Aruba, asina Lampe ta konta. Te ainda Padú ta aparesé na kasi tur presentashon públiko ku tin. E biaha akí tambe e ta sintá na di promé rei, serka e invitadonan di honor. Promé e himno tabata konsistí di dos kuplèt, despues Padú a añadí un di tres. E ta kontentu di mira ku tur hende ta kanta e himno na bos haltu i di kurason.
Spich
Tradishonalmente minister di Kultura i promé minister di Aruba a tene un spich. Minister nobo Michelle Winklaar a indiká loke por mehorá na Aruba. El a boga pa hende ta mas abierto ku otro i bisa tambe ku mester risibí esnan ku ta bini pafó di Aruba ku mente habrí. Promé minister Mike Eman a konta tur e bendishonnan di Aruba. Esnan ku tabata puntra nan mes ta di unda tur eseinan tabata bini, mester wak na laira.
Manera kustumber tabatin invitado di Antia tambe. Promé minister Emily de Jongh-Elhage kier a ekspresá ku su bishita ku puebo rubiano i antiano ta ruman di otro den Reino. E ta spera ku ta pa delaster biaha e tei presente komo promé minister antiano riba 'Dia di Bandera'. Si e fecha famoso di 10-10-10 sigui, otro aña lo tin un delegashon di pais Kòrsou presente. De Jongh-Elhage ta spera ku pueblo lo a skohe su persona e ora ei komo promé minister di pais Kòrsou.
Email this Article
Printer-friendly version
Awor loke falta den reino ta, pa Hulanda sigui e ehempel di Aruba y e otro Islanan pa nan tambe bin cu nan Dia di Himno y Bandera.
Hulanda su Wilhelmus ta un di e Himnonan di mas bieu di Europa.
Pa Aruba e fecha cu a ser skogi como Dia di nos Himno y Bandera ta pone e dia aki nifica hopi mas pa nos Pais, pasobra e ta e Dia cu a entrega e firmanan di e Pueblo di Aruba pa Aruba a obtene su status di Pais Independiente den un Reino cu mester a bira un Gemenebest cu Aruba como e di cuater Pais miembro!
Post new comment