Remarkablemente hopi Antiano i Rubiano di edat avansá ta envolví den froude ku ùitkeren. Ta trata aki di grandinan ku a keda sin informá instanshanan di e penshun di behes ku nan ta risibí di Antia i Aruba.

Region Noord Holland ta konsistí di 26 munisipio. 'Ta trata entre otro di munisipio di Hoorn, Heerhugowaard, Alkmaar i Den Helder' asina Johan Bekkema, hefe di reshèrshi sosial na Noord Holland ta komentá. 'Tin un grupo a skohe pa no bisa ku nan ta haña penshun di behes di nan isla, i tin un otro ku a lubidá di bisa ku nan ta hañ'é. Na tur tin 60 pa 80 hende di e kuater munisipionan menshoná'.

Bekkema ta añadí ku no ta asina ku Antiano i Rubiano ta kometé mas froude ku otro grupo den komunidat, esei sigur no ta e kaso.

Froude
E asuntu a bin sali na kla na momento ku un señora antiano mester a presentá su steitmentnan di banko pa sa mas di su kapital. 'Dos reshèrshi a studia e papelnan i a detektá un depósito di penshun di behes. Ora nan a hasi mas pregunta tokante e depósito, el a bisa ku e tabata haña e suma mensualmente. Ta asina e wega a bai ròndu'. Bekkema ta mustra tambe ku nòrmalmente ta asina, ku nan dato ta mará na esnan di belásten. Pero banko di seguro sosial SVB na Aruba i Antia no ta konektá ku esun hulandes òf ku belasten na Hulanda.
 
Sürnam
Segun Bekkema den e investigashon akí reshèrshi sosial a atendé parsialmente ku Sürnam. 'Nan ta haña un otro tipo di ùitkeren, ta p'esei nos a laga nan afó den e inbestigashon'.

Fuera di froude ku ùitkeren di penshun di behes, reshèrshi sosial ta atendé tambe ku hende ku ta traha ilegalmente i ku ta risibí un ùitkeren, i tambe ku esnan ku ta kometé froude di bibienda. 'Esei ta enserá ku hende no ta bisa ku nan ta bibá na un otro adrès òf ku nan ta biba huntu. Pero na opinion di Johan Bekkema esei ta sosodé den tur gremio di sosiedat.