Awe Reina Beatris a huramentá mr. Frits Goedgedrag i drs. Eugene Holiday komo gobernador, respektivamente di Kòrsou i di Sint-Maarten. E seremonia a tuma lugá na palasio Huis ten Bosch na Hulanda. Ku esaki a bolbe dal un paso nobo den direkshon di e relashonnan estatal nobo den seno di Reino ulandes.

 

Despues di desmantelashon di Antia ulandes entrante 10 di òktober 2010 (10-10-10), Kòrsou i Sint-Maarten lo bira paisnan outónomo den Reino. Ta pa e motibu akí ámbos pais mester di su propio gobernador. Te na e fecha ei, señor Goedgedrag lo keda gobernador di Antia, miéntras ku na Sint-Maarten ta gezaghebber ta e funshonario mas haltu na e momentu akí.