Gobernador a risibí e konseho di huristanan Grüning i Koeijers tokante e pasonan ku por tuma pa sali for di e impase di bahamentu di e gabinete demishonario pa un mayoria den Staten.

Grüning i Koeijers ta konkluí ku e miembronan di Staten mes mester trata pa sali for di e impase polítiko aktual. Si mayoria di miembronan di Staten ta di opinion ku mayoria di e ministernan demishonario di e gabinete aktual mester baha, ta na e mayoria den Staten ei pa formalisá esaki pa medio di aseptamentu di moshon di deskonfiansa kontra e ministernan individual, i asina demonstrá ku e ministernan demishonario di gabinete Schotte no tin sosten mas di un mayoria den Staten.

Propio responsabilidat
Segun e konseheronan ta importante pa e miembronan di Staten mes, huntu tuma responsabilidat i pèrkurá pa Staten por funshoná manera mester ta.

Segun e konseho, gobernador den su funshon konstitushonal, no por aktua sin ku ministernan di e gabinete demishonario karga responsabilidat polítiko p’esaki.

Aktuashon di gobernador komo Órgano di Reino ainda no ta al kaso. Den interes di Kòrsou i su eksistensha hóben komo demokrasia ta deseabel pa riba nivel di e pais mes ofresé tur solushon posibel.

Segun e konseho, gobernador solamente den e kaso mas ekstremo lo investigá posibilidat pa drecha garantia di demokrasia, si resultá ku Staten mes no ta kapas di funshoná seriamente.