Pa Kòrsou ta mas mihó si bin awor un gabinete di eksperto. Esaki segun e historiadó James Schrils. Schrils ta reakshoná riba e krísis aktual na Kòrsou. Gobièrnu di Kòrsou a pèrdè su mayoria den parlamentu despues ku parlamentario Eugene Cleopa di partido di koalishon MAN a retirá su sosten na gobièrnu pasó e no ta kontentu ku manera kosnan ta bai. E aktual koalishon tin awor 10 di e 21 asientonan.

Segun Schrils esaki ta sufiente motibu pa papia di un krísis. Tòg e ta kere ku gobièrnu lo haña un mayoria nobo lihé, pasó Anthony Godett, lider di partido di oposishon FOL ya pa alguna luna kaba ta duna di konose ku e ke yuda gobièrnu haña un mayoria.

Man limpi
Pero e historiadó ta duda ku si esaki ta e mihó solushon pa Kòrsou. E no ta boga tampoko pa elekshon nobo, pero e ta proponé un gabinete di eksperto. Ministernan ku desensia i ku man limpi ku por tuma desishon. Huntu nan mester pone kos na òrdu. Pero ken mester forma parti di un gabinete asina? Nan por djis yama Schrils, e ta dispuesto na asumí un enkargo. I asina tin hopi hende mas ku ke tuma e enkargo aki, asina Schrils ta kere firmemente.

P'e un gobièrnu di eksperto ta un alternativa sólido. Un gabinete asina'ki mester haña dos aña di tempu pa pone tur kos na òrdu. Komo ehèmpel e ta menshoná hòspital. Kuarenta aña kaba nan ta papia tokante un hòspital nobo, mientras e hòspital ei mester tabat'ei kuarenta aña kaba. Schrils ta haña enseñansa tambe hopi bou di nivel.

Kompletamente bankrut
E gobièrnu aktual no tin energia, pero elekshon nobo tampoko no ta solushon, segun Schrils. 'Bou di gobièrnu di PAR, Kòrsou a bai fayit dentro di dies aña, kemen si PAR bolbe bin na mando e situashon lo no drecha niun tiki. Nul-komma-nul', segun e historiadó