Ta parse ku e fecha planeá pa desmantelashon di Antia, 10 di òktober 2010 (10-10-10) a bira inalkansabel awor ku gabinete-Balkenende a kai. Hopi ta dependé di e pregunta si parlamento hulandes ta konsiderá renobashon estatal komo kontroversial. Pasobra den e kaso ei sí e parlamento demisionario no por tuma desishon mas riba e asuntu aki.
 

Nèt awó ambiente na Antia tabata optimista, pasobra hustamente e mesun dia di krísis na Hulanda, Antia a sera un akuerdo di gobernashon nobo. Den un temopu rèkòrt informadó Pedro Atacho a logra uni e partidonan ku e meta prinsipal: prepará desmantelashon di Antia.
 

Mester a hasi purá pa terminá e proseso promé ku e próksimo elekshonnan na Hulanda. I pa alkansá 10-10-10 tempu tabata pèrtá kaba. Awor ku probablemente lo bini elekshon nobo na Hulanda, siguí pa un posibel periodo largu di formashon, ta kasi sigur ku lo no alkansá e fecha aki mas.
 

Asuntu koriente
Uniko posibilidat ta ku Parlamento ta haña ku e proseso mester kontinuá i ta konsider’é un asuntu koriente. Asina mes òktober 2010 lo keda kasi inalkansabel, pero sekretario di estado, miembro di CDA Ank Bijleveld di Relashonnan den Reino (ku asta por bira minister, komo ku minister Ter Horst di Asuntunan Interior, miembro di PvdA mester baha) por sigui ku tratamentu di e lèinan nesesario den Parlamento.

Pero ta di duda ku lo trata e proseso estatal komo asuntu koriente, pasobra sosten den Parlamento a baha konsiderablemente. Netamente VVD, ku tempunan ayá tabata pará huntu ku minister Nicolaï na kuna di e proseso, a move bai den direkshon di Geert Wilders di PVV, ku ta redondamente kontra di e proseso. SP tambe tin su dudanan.

Ke men chèns ta grandi ku lo konsiderá e renobashon estatal komo un kaso kontroversial. I kiko lo pasa despues di elekshon tambe ta un pregunta grandi, pasobra ta ferwagt ku e oponentenan lo gana puesto. Asina ta ku ‘e ultimo gobièrnu di Antia’ kisas lo sinta mas largu ku tabata e intenshon.

Saniamentu di debe
A kuminsá kaba ku trámitenan pa saniamentu di debe di Antia i ta p'esei esaki lo sigui. Ounke ku Bijleveld a usa e saniamentu di debe komo preshon pa pone e islanan sera kompromiso tokante presupuesto, en prinsipio esaki no ta vinkulá ku desmantelashon di Antia. E saniamentu ta stipulá kaba den e presupuestonan.