Jürgen Locadia futbolista desendiente antiano ta forma parti dje selekshon hubenil di futbòl Jong Oranje. E selekshon nashonal di Hulanda bou di 17 aña ta partisipando na e weganan di klasifikashon na Andora pa por partisipá n'e kampionato oropeo di futbòl hubenil. Mama di Jürgen, Nataly Locadia, ta hopi kontentu ku su yu a haña un chèns pa por logra su soñonan.
 
For di chikí Jürgen a kuminsá hunga bala den bario ku su amigunan. Despues el a sigui pa klùp di futbòl di Emmen i pa Willem II na Tilburg. Su mama Nataly Locadia ta mashá orguyoso i a bisa ku Jürgen a keda mashá kontentu ora el a tende dje entrenadó di Jong Oranje ku e ta selekshoná. "El a grita di alegria den su kamber ora e entrenadó a bel'é. E no tabatin palabra mas pa bisa algu. Ta ami mester a sigui papia ku e entrenadó."
 
Gol
Jong Oranje a gana dia 22 di òktober ku skor di 4 - 0 kontra e ekipo hubenil di Andora. Jürgen a hinka un dje kuater golnan. E wega kontra Malta e ekipo oraño a pèrdè ku 2-1. Pero esun gol tabata di Jürgen Locadia. Na Hulanda su mama ta trata pa presensiá tur wega. Nataly Locadia: "Lástimamente esei no por ora nan hunga pafó di Hulanda. E weganan ei ta difísil pa presensiá." Dia 27 di òktober Jong Oranje ta hunga kontra di Irlanda. Segun Nataly Locadia si Jong Oranje empatá òf gana, tòg nan lo klasifiká pa e kampionato oropeo.
 
Nataly Locadia ta bisa mas aleu ku mester apuntá ku no ta muchanan yu di Kòrsou mala mucha só tin na Hulanda. Tin talentonan yu di Kòrsou ku hopi no ta mira. E ta kontentu ku Jürgen a haña e oportunidat i guia pa traha riba su futuro di un bon manera.