Futbolista profeshonal antiano Anton Jongsma a pone famia promé ku wega di bala, i p'esei a swich di RKC Waalwijk di promé divishon pa FC Emmen na nivel di amatùr. Jongsma a tuma e desishon akí despues ku su pareha i su yu a muda bai biba na Groningen. 'Mi famia tabata basta leu, mi a haña heimwee'. E ta bisa ku ta 'leuk si bo por gana bo sèn ku wega di bala', pero ku e no tabata kontentu ku su situashon privá.

Promé ku e kambio drástiko akí e futbolista mester a operá dos biaha. Jongsma ta atmití ku tabata difísil pa tuma e desishon. For di chikitu e tabata hunga bala. Nèt awor ku el a logra e nivel ku e tabata aspirá el a ripará ku e no tabata kontentu. E ta spera ku serka e klup amatùr e por bolbe drecha su kondishon. Su klup aktual ta pagando un kurso di entrenadó p'e.

Soño
E no sa kon lo para ku su karera komo futbolista. Di su mènedjer el a komprondé ku tin algun pais ku lo ta interesá den dje. Esei mester kaba di konkretisá su mes ainda. 'Den wega di futbòl bo no sa kiko ta sosodé otro aña.' E ta spera di por bolbe hunga bala den divishon di honor pero no esei so. Su soño ta pa e por bolbe representá Antia. El a yega di hasi esei un biaha kaba. P'e tabata 'e kos di mas leuk' ku a tok'é komo futbolista.

Skucha Leila Wijnhoven den un entrevista ku Anton Jongsma