E Hulandes Arubano Joshua a alkansá final di e konkurso di talento popular Popstars na televishon hulandes. Joshua su oudishon a bai bon i el a gana den tur e ròndunan ku a sigui.

Djabièrne dia 20 di novèmber ta e promé anochi di final i e mester aktua 'live' den e transmishon. Na prinsipio Joshua no kera partisipá na e oudishonnan. "Ta mi mama a duna mi nòmber, pasobra mi ta basta tímido pa kanta dilanti hende."
 

Joshua sa di skonde su nervionan bon, ma e ta sinti nan hopi. El a keda sorpresá di e reakshonnan positivo riba su oudishon. "Nan no tabatin krítika mes." Ora e transmishonnan na televishon a kuminsá tur kos a bai masha rápido. "E tres dianan ei tabata mashá pisá."
 

No opstante su raisnan karibense tòg e ta preokupá pa e bailamentu 'live' den e shownan. "Esei si mi no a heredá." Entretantu el a siña kon prepará su mes pa e no ta tímido: "Bo mester djis 'rock'." E ta spera di por bira un artista profeshonal, pa e por biba di dje.
 

Skucha e entrevista di Leila Wijnhoven ku Joshua