Ayera tabata pa promé biá ku famia Plantijn a bishitá De Naald, e lugá kaminda Wilfrido a fayesé den e atentado di Aña di Larèina na Apeldoorn. Huntu ku integrantenan di e grupo di baile Ekspreshon Kultural, nan a sende bela i resa. Famia di defuntu Plantijn i su grupo di baile poko poko ta purba sigui ku nan bida i wak padilanti, pero no ta fásil.

Rick Plantijn, yu hòmber di Wilfrido, ta haña nesesario pa bishitá e lugá na De Naald na Apeldoorn. "Pa dun'é un lugá den nos kurason." Tòg e echo ku e ta akudí einan ta eksit'é. Pa kasualidat el a pasa de Naald kaba na kaminda pa un sita ku sekretario di Kolegio Munisipal di Apeldoorn. "Tabata un sensashon masha straño."

Flor
Isora Leal ku t'ei huntu ku su ruman muhé O'Neilla Leal (nan tur dos kétubai den ròlstul), ta bishitá e lugá pa di dos be. "E promé be mi so a bini ku bùs. Awor nos ta ku algun miembro di e grupo. Ta poko emoshonante si." E ta bai pone un bukèt di flor na e monumento djis enfrente di De Naald. Einan un fotógrafo ta aserk'é i puntr'é si Aña di Larèina e tabatin un shimis kòrá bistí. E fotógrafo ta mashá kontentu di mira ku Isora ta na bida ainda.

Pesadia
Famia Plantijn i miembronan di e grupo di baile a basha na yoramentu n'e monumento. Nan a sende bela pa Wilfrido. I nan a resa. Un ñetu a laga un kartika atras: 'Ei Opa, tur kos ta bon ei riba? Ma mi ta sinti bo falta aki bou. Mi'n por drumi mes. Tur dia mi tin pesadia di e aksidente.'

Despues e grupo ta wak rònt den bisendario di De Naald pa rekonstruí e aksidente i interkambiá rekuerdo di e dia. Nan ta tuma tempu tambe pa e miembronan di prensa ku ta presente. Norayda Maduro-Plantijn, yu muhé di defuntu Wilfrido, ta kontentu di ta na Apeldoorn i mira e lugá: "Mi kier a sa unda e kos a pasa, unda e tabata pará? Unda nan tabata pará?

Kiko a sosodé
Aña di Larèina Expreshon Kultural lo a duna un presentashon di baile na e festividatnan. E integrantenan di e grupo di baile antiano tabata pará kant'i kaminda ta mira desfile di Famia Real ora ku direpente Karst T. a rèis ku su Suzuki Swift i kore drenta den e multitut. Na tur a kai ocho morto, den nan Karst T. mes tambe. Den e grupo di baile Expreshon Kultural a kai un morto, tres integrante a keda gravemente heridá. Ainda nan ta den ròlstul. Seka dos di nan no ta sigur ku nan lo bin kana atrobe. Algun miembro di e grupo a haña herida leve, sobrá a keda ileso. Ta spanta so nan a spanta.
 

Skucha e reportahe di radio di Patricia Cronie.