Grupo di baile folklóriko Expreshon Kultural di Almere ta reanudá su ensayonan, mas ku'n luna despues di e tragedia di Dia di Larèina na Apeldoorn. Siman ku ta bin lo reinisiá e treinengnan gradualmente i asta tin pensá di duna presentashon atrobe, asina Sidney Stacie, treiner di e grupo di baile a bisa.

Dia 30 di aprel último Expreshon Kultural tabata na Apeldoorn ku nuebe integrante pa partisipá na e desfile pa Larèina, ora ku direpente e outo di Karst T. a rèis riba nan. Impakto dje vehíkulo a manda nan lèira. Un di e integrantenan, Wilfrido Plantijn di 71 aña di edat, a pèrdè su bida den e atentado, ku probablemente tabata dirigí kontra Famia Real. Vários otro integrante a keda eridá.

Sidney Stacie ta bisa ku ainda tin ún erido interná na hòspital na Zwolle. Dos otro ta na kas atrobe, kaminda ta sigui ku revalidashon. Demas miembro di e grupo a rekupera un tiki atrobe mentalmente. "Tur hende tabata realmente down e promé par di dia." Despues di hopi kòmbersashon ku personal di yudansa pa víktima i den nan mes seno, kos ta bayendo den bon direkshon.

Na prinsipio algun integrante a bisa di no kier balia nunka mas, pero pronto lo reanudá e ensayonan. Tratamentu di  e parti di indemnisashon ta kore via di kompania di seguro. Segun Stacie nan ta risibiendo yudansa di eksperto.