E grupo di baile antiano Expreshon Kultural di Almere, despues ku a transkurí kuater luna di e drama di Aña di La Reina, ke pone un punto tras dje periodo tristu aki. Awor ku kasi tur e miembronan dje grupo a bandoná sea hòspital òf e sentro di revalidashon, ta e bon momentu pa hasi esaki.

Pa e tres miembronan ku for di despues dje desgrasia ta den ròlstul, tin un kaminda largu ainda promé ku nan ta komplétamente rekuperá, pero e deseo pa sigui ku nan bida ta grandi. Ta p'esei a pidi e pastor popular di Kòrsou Simon Wilson kende ta na Hulanda pa un gira, pa bendishoná e grupo di baile.

Na komienso dje anochi e miembronan di Expreshon Kultural i nan famia a drenta un pa un Route 66 na Almere, un sitio kaminda ta organisá hopi fiesta antiano. Famia i amigunan a hisa saka for di outo tres dje miembronan ku a sufri mas tantu i a pone nan den ròlstul. Sidney Stacie entrenadó dje grupo a yama nan bonbiní. For di despues dje aksidente, Stacie ta fungi komo bosero di e grupo huntu ku Rick Plantijn, yu di Wilfrido Plantijn, nèstòr dje grupo ku a muri den e aksidente.

Periodo tristu
Esaki ta e promé biá for di despues di 30 di aprel ku tur e miembronan di Expreshon Kultural ta huntu atrobe. Pa O'Neilla Leal, lider di e grupo di baile i tambe pa Rudsel Haddocks ku ta seriamente heridá, esaki tabata e promé biá ku nan a presentá den públiko. Tur dos ainda ta den ròlstul. Isora, e ruman muhé di O'Neilla tambe, pero e por kana distansia kòrtiku riba krùk.

E enkuentro den Route 66 ta organisá pa famia dje rumannan muhé Leal. Nan a haña pastor Wilson Simon dispuesto pa resa ku e grupo. Di e forma aki e grupo ke sera un periodo turbulento i kuminsá di nobo.

Pastor Simon tabata visiblemente afektá ora ku el a saludá e miembronan di Expreshon Kultural ku ainda ta den ròlstul. Simon: "Na Kòrsou mi a tende naturalmente di loke a pasa na Hulanda. I ei tambe mi a dirigí e servisio ekuméniko pa e víktimanan i nan famia. Pero aki mi por wak ku mi propio wowonan kuantu doló i vèrdrit tin".

E pastor ta sinti su mes envolví ku e hendenan, prinsipalmente pasobra el a batisá e yunan di Isora. Despues pastor Simon ta mira Rudsel Haddocks den su ròlstul. "Bo parse un hende konosí", el a bisa Haddocks. "Si pastor, na Kòrsou mi tabata biba na Suffisant. Ta di einan pastor konosé mi", segun e bailadó tristu ku a konfia pastor ku e tin mashá gana di por bolbe kana.

Orashon
Despues a yama tur e miembronan dje grupo di baile un pa un dilanti. Famia a kore hiba esnan ku ainda ta den ròlstul. Riba un mesa haltu tin dos bela blanku i tambe un pòtrèt di Wilfrido Plantijn ku a muri den e drama riba Aña di La Reina. Pastor Simon a dirigí e orashon.

E enkuentro na Almere a bin riba su programa. Durante ún di su misanan, el a topa ku dos miembro dje grupo di baile, kendenan a pidié pa hasi e misa na Almere. Pastor Simon no a pens'é niun momentu. "Pero e mester a bira un enkuentro íntimo di famia i amigunan sí", asina Simon a splika. Pastor Simon a teme ku lo no tin sufisiente stul pa tur hende, si duna konosementu amplio na e enkuentro aki, pasobra Almere ta disponé di un komunidat antiano grandi.

Yamada di promé minister
Presentenan a tende tambe un diskurso telefóniko di promé minister antiano Emily de Jongh-Elhage. El a deseá e miembronan di Expreshon Kultural hopi forsa i suerte pa futuro. Públiko a risibí palabranan di De Jongh-elhage ku aplouso. Segun entrenadó Sidney Stacie, hopi hende na Hulanda i Antia ta biba ku e grupo. "Último lunanan nos a risibí hopi sosten loke ta yuda e hendenan ku ainda no a rekuperá mashá."

Pa Sidney Stacie e enkuentro na Almere di bèrdat ta un komienso nobo. "Awe nochi mi a mira hopi desaroyo emoshonal. O'Neilla i Rudsel tabatin problema pa presentá den públiko. Ta bisto ku pa nan ainda ta hopi difísil. Pero a hasi un apertura ora ku nan mes a tuma e mikrofon den man pa gradisí tur hende pa nan asistensia."

Kaminda largu
Pa sigur dos miembro dje grupo tin un kaminda largu pa kana promé ku nan ta komplétamente kurá. Síkikamente tambe ta difísil ainda pa nan. Pero e miembronan di e grupo di baile ta haña hopi sosten serka otro. E enkuentro personal ku kasá i yunan di Wilfrido Plantijn a lòs hopi emoshon, prinsipalmente serka O'Neilla Leal.

"Último lunanan nos tabata hopi leu for di otro, pero tòg hopi serka dor dje tantísimo yamadanan di telefòn i di sosten", O'Neilla a bisa ku awa na wowo. Aña di La Reina 2009 a kuminsá kontentu pa grupo di baile Expreshon Kultural, pero a kaba den un drama. Dia 15 di ougùstùs, e fecha riba kua e grupo ke sera e periodo ta kuminsá un tiki tristu, pero ta kaba tòg ku un tono alegre.

E miembronan ku a rekuperá kaba òf ku no tabata presente riba e dia fatal na Apeldoorn, a kore subi dansflur ku tres miembro den ròlstul i riba tono di músika antiano nan a baila i hari. Pa un ratu a lubida tur miseria i tristesa.