Relashoná ku kambionan estatal di 10-10-10, parlamentario Eveline Wever Croes di MEP ta señalá ku e státus aparte di pais nobo Kòrsou i Sint Maarten ta diferente na esun di Aruba. 'Nan tin e dispensashon di debenan ku ta yuda nan'. Wever Croes ta splika ku Aruba no a haña saneamentu di debe. 'Ora bo drenta un státus aparte ku un saneamentu di debe asina grandi ta lógiko ku esun ku ta duna bo saneamentu di debe ke tin algu mas di bisa.' Segun e parlamentario 'polítikonan na Hulanda ta kere ku nan tin e mes outoridat i derecho pa pone supervishon riba Aruba tambe.'

Aruba ta yama e paisnan nobo bon biní, asina Wever Croes ta bisa. E parlamentario ta bisa ku rubiano ta hende humilde di bon kurason.

Momento ku nan mira ku 'dos pueblo ruman ta haña lokual ku nos a haña, nos ta kontentu.' Un ten e mes pueblonan a wak Aruba su lucha pa un státus aparte 'ku un poko di menospresio.'

Kopartidario Andy Lee ta kere ku e státus nobo di Kòrsou i Sint-Maarten por krea chènsnan nobo pa e isla. Segun Lee e islanan por bai kompetí ku otro. Pero koperashon huntu por tin su bentahanan. 'Si bo por traha konhuntu bo por logra hopi konhunto tambe.' En bista di esei 'Aruba ta kla pa yama bon biní na paisnan ruman nobo.