Direktor Hendrik Noorderhaven di EU-Claim ta lamentá ku el a kalifiká kompania aéreo KLM komo gañadó den medionan di komunikashon. Esei el a atmití den korte na Zeist.

EU-Claim ta sali na defensa di interes di pasahero di aviashon na momento ku nan tin retraso i a yega di midi forsa mas biaha kaba ku KLM. Delaster ei Noorderhaven a bisa den un entrevista ku De Telegraaf ku 'pa años kompanianan ta gaña sin rel ni trel ora ta trata di retraso. KLM ta number un.' KLM a reakshoná ku un huisio sumario.

Kompromiso
Despues di un brek chikitu a petishon di wes, e dos partidonan a logra yega na un kompromiso. Noorderhaven lo publiká un rektifikashon, den kua e ta distanshá su mes di su deklarashon ku KLM lo ta gaña ora ta trata di retraso. KLM na su turno ta hala e dwangsom ku nan a eksihí aden. Den un reakshon KLM a deklará di ta kontentu ku nan por a defendé nan mes. 'Pa nos e kos akí tabata un kaso di prinsipio. Nos no ta aseptá ku nan ta bisa ku nos ta gaña'.

Durante e seshon a sali na kla ku KLM i EU-Claim a enfrentá otro pa oranan largu djaluna anochi na Amsterdam. Pero nan no a logra resolvé e asuntu. E dos partidonan no ke bisa ta dikon nan no a logra yega na un solushon na e okashon ei.

'Mi no tin problema ku e teksto ku lo pone den e rektifikashon, asina Noorderhaven tabata dispuesto di deklará despues di e seshon. 'Mi ta representá pasaheronan. Si nos sigui bringa otro, esei no ta na bienestar di nan.

Kaba ku bo
Noorderhaven no kier a bisa si ta un remarke ku wes a hasi durante e huisio sumario a hib'é n'e solushon. 'Un partido grandi mané KLM ta kapas di kibrábo', asina wes lo a bis'é. Tin 7 hende den servisio di EU-Claim, KLM tin 30.000. 'Bo por bisa tur kos, pero esei ta na interes di bo kompania?', asina wes a komentá.