Por solushoná e problema di kriminalidat bou di Antiano solamente pa medio di un programa soshal robustu pa mamanan antiano. Marion van San katedrátiko Hubentut i Edukashon di Antiano na Universidat di Utrecht i Universidat di Antia Hulandes, ta afirmá esaki djaluna 28 di sèptèmber den su diskurso 'De aantrekkingskracht van 'gevaarlijk' mannen', esta 'e atrakshon di hòmbernan 'peligroso''.

Segun Van San delaster diesinku aña apénas a yega na un mehoramentu dje problema di hóbennan antiano kriminal. Na 1998 el a promové riba un tésis tokante kriminalidat bou di muchanan hòmber antiano. For di investigashon despues a sali na kla ku hende muhé ta hunga un ròl grandi den esaki. "Mamanan, hendenan muhé, amiganan, baisaitnan semper ta hunga un ròl den fondo."

E atenshon ta bai dirihí partikularmente riba hóbennan, pero mester pone mas atenshon na hende muhé pa solushoná e problema, segun Van San. "Alafin ta sierto hende muhé for dje klasenan soshal-ekonómiko abou ku ta sinti atrakshon pa hende hòmber 'peligroso'. E hendenan muhé akí tambe ta lanta nan yunan hòmber, pa nan bira hende hòmber 'peligroso'.

Tapa kara pa kriminalidat
Esei ta sosodé pa gran parti inkonsientemente, asina e investigadó ta añadí dirèkt. Por ehèmpel nan ta tapa kara ora e yunan hòmber bin kas ku kos hòrtá òf ora nan kometé violensha. "No tin niun mama ku ta stimulá algu asina. Pero den sierto sentido nan ta ko-responsabel ora nan tapa kara pa loke sosodé." E ambiente kriminal den kua nan ta sinta ta hasi e situashon èkstra difísil pa nan defendé nan mes kontra esei.

Van San por komprondé e reakshonnan negativo di Antiano riba su investigashonnan. "Nan no ta rekonosé nan mes den esei." Pasobra ta trata di un grupo chikí i segun e profesor su konklushonnan ta klòp tambe pa otro gruponan étniko kultural. "Tur kaminda bo ta mira hende muhé involukrá den kriminalidat. No komo malhechor, pero hopi biá nan ta fasilitá e kriminalidat."

Guia mamanan
Pa e motibu ei mester involukrá mamanan pa solushoná e problemanan, asina Van San ta ripití atrobe ku énfasis. "Guia nan riba tereno di kapasitashon i trabou, ya nan mes por yega na sufisiente entrada i nan no mester e yunan hòmber pa esei." Si muchanan muhé sali na estado ta kita nan for di skol. Pero segun Van San mester stimulá nan pa nan kaba nan estudio. "Mester bini ku un programa soshal robustu pa mamanan na Hulanda i Antia."

Profesor dr. Marion van San ta tene tambe dia 3 di novèmber su diskurso durante aseptashon dje kátedra 'Hubentut i Edukashon di Antianonan" na Universidat di Antia HUlandes.

Skucha un kombersashon ku Scarlet Windster a tene ku profesor Marion van San.