E gran mayoria di poblashon di Boneiru, Sint Eustatius, Saba i Sint Maarten ta haña ku situashon na nan isla a empeorá for di momento dje kambionan estatal aña pasá. Un enkuesta di Wereldomroep ku a tene na kuater isla ta demostrá esaki.

Kolegionan Insular di Islanan BES a haña mal sifra di rapòrt dje habitantenan: Boneiru i Statia a skor un
'onvoldoende' mahos (resp. 4.7 i 4.2) i esun na Saba no ta ni un seis (5.9).  

A baha pisá riba gobièrnu sentral (Hulanda) tambe. Sobretodo na Sint Eustatius, ku a parti un 3.7. Kompará k'esei e 5.8 di Saba ta muchu mas mió, mientras ku e 5.1 di Boneiru tambe poko lali lali.

Sint Maarten
E konfiansa den gobièrnu di Sint Maarten tambe ta tiki: e habitantenan a duna nan gobièrnu un 5.2. Na e isla por lo menos mitar dje poblashon ta di opinion ku kos ta bayendo pió for di momento ku e isla a bira pais outónomo. Si tene elekshon awóraki anto e or'ei no ta sigur si e koalishon di gobièrnu di promé minister Wescot-Williams por keda sinta.

Un aña pasá Antia ulandes a stòp di eksistí. Boneiru, Sint Eustatius i Saba a bira munisipio ulandes den Karibe; Sint Maarten i Kòrsou a sigui den seno di Reino komo pais outónomo. E enkuesta di Wereldomroep ta demostrá ku e optimismo dje tempu ei no a materialisá. Hopi isleño ku a kere ku kos lo a drecha, a keda defroudá.

Hulanda i gobièrnu lokal kulpabel
Situashon na islanan BES a bira malu òf pió, segun treskuart dje poblashon, ku alabes a ripará ku forsa di kompra a baha. Esaki ta Kolegio insular por ke, segun e mes porsentahe di persona entrevistá.

E malkontentu ta sali na kla, no den sifra di rapòrt so, sino tambe riba loke lo vota si tene elekshon nobo. E aktual kolegionan lo kome basta sla, pasó ta riba apoyo di un terser dje poblashon so nan por konta e or'ei.

Hulanda tambe mester paga. E treskuart di poblashon malkontentu no solamente ta konfirmá e impreshon ku habitantenan insular ta haña ku kos ta empeorando, sino dku ta mustra riba e kulpabelnan tambe: Hulanda i e propio Kolegio insular.

Siman pasá Curconsult a tene e enkuesta di Wereldomroep. Lesa tambe resultado dje enkuesta ku a tene fin di ougùstùs na Kòrsou tokante renovashon estatal.