Parlamento di Kòrsou ayera unánimamente a aseptá un moshon di frakshon di PAR kaminda ta pidi minister di Hustisia Elmer Wilsoe pa tur luna reportá tokante kombatimentu di kriminalidat riba e isla. Pasobra último tempu ta reina hopi kriminalidat.

Segun minister Wilsoe ta idea. Hende ta kere ku kriminalidat a oumentá, pero e ta bisa ku sifranan no ta sostené e idea aki. Tòg el a anunsia yen di medida.
Awe nos Parada ta bini for di Marshe Nobo i e kaminda di kome kuminda krioyo Plasa Bieu. E bishitantenan ta hartá di kriminalidat. Hopi hende ta haña ku masha dia mester a tuma medida konkreto. Otro hende ta bini ku nan solushon pa kontené kriminalidat.

No ta seif
Tur bishitante ku a papia kuné ta konfirmá e sintimentunan ku ta reina bou di pueblo tokante kriminalidat: “Nos no ta sinti nos mes seif, ni riba kaya ni na kas.” E sintimentu ku kriminalidat a sali kompletamente for di man t’ei, fuerte i real. Espesialmente seka esnan grandi di edat na Kòrsou pasobra ta manera ku último simannan regularmente nan tabata víktima di atrako violente, hopi be den nan mes kas.

Un hòmber di kasi ochenta aña ta bini Punda tres be pa siman i semper e ta sinta nèt dilanti Marshe Nobo, huntu ku otro penshonado. Nan ta papia hopi tokante atrako riba hende mayor di edat. “Kòrsou di bèrdè mes a bai atras”, e ta bisa ku tristesa den su bos. “Kòrsou no ta e Kòrsou di ántes mas. Mi mes mester tene hopi kidou pa nada no pasa mi òf mi amigunan.”

Solushon
E bishitantenan ku a entrevistá tambe ta bini ku solushon. “Polis mester bai den bario kaminda tin hopi hóben ta biba i papia ku nan tokante e loke nan ke”, un señora ta bisa ku énfasis. “Laga nan mes bisa kiko nan ke. Nan ke hunga futbòl? Nan ke mas aktividat di deporte?”
Djamars anochi un promé reunion ta tuma lugá di ‘polis den bario’. Kuerpo di polis lo ta presente na Souax. Esaki ta un di e puntonan di enfoke di minister di Hustisia Wilsoe. Polis mester ‘gana konfiansa di bario bèk’.

Edukashon
Banda di aktividat den bario pa hóben, ta menta kreamentu di trabou tambe komo un bon solushon Un otro solushon ta mas atenshon pa edukashon na kas, segun un tata. El a kaba di kome na Plasa Bieu. “Mi tin 17 aña bèk riba e isla aki i kisas e kantidat di kriminalidat a keda meskos sí, pero awor e aktonan ta mas pió, mas violente.”

Minister Wilsoe den su splikashon di enfoke di kriminalidat a bisa: ‘loke nos a sembra durante tur e añanan, awor nos ta kosechá’. E tata aki den Plasa Bieu tambe ta enfatisá ku ta importante pa duna atenshon na edukashon di mucha. ‘Antes e mama tabata keda kas i e tabata eduká e yunan. Awor, despues di 20 pa 25 aña, esaki no ta e kaso mas. Tempu a kambia berdaderamente, pero nos mester bai atrobe den direkshon di mas atenshon pa mucha na kas.”