“Si e laso akí ta di benefisio pa e empresa-, institushon- i pueblonan di tur e partinan di reino, reino lo tin derecho di eksistensia – asta den bista di e krítikonan na Hulanda ku ta haña ku e parti europeo no ta saka nada for di nan kooperashon ku e partinan karibense.” Minister presidente Mike Eman di Aruba ta haña ku e enfoke win-win akí tin sentido i ta ‘realístiko’.

“Lo mi no komentá riba e tenshonnan ku tin entre Hulanda i otro partinan den reino. Mi predesesor i su gobièrnu tambe a kue pleitu ku Hulanda hasi nan hòbi, pero ami no ta mira kiko bo ta gana ku esei”, segun Eman. E premier ta haña ku si e partnernan traha huntu na un manera habrí i konstruktivo, enfokando mas riba loke ta uni nan en bes di loke ta dividí nan,  semper esei ta mihó pa e relashon.

Mulina di bientu
“Hulanda ta hopi interesá di penetrá Suramérika komersialmente i Aruba por yud’é logra esei”, Eman a bisa. “Nos tin bon kontaktonan den e region ei i ta familiarisá ku nan kultura- i mentalidatnan; idioma tampoko no ta un barera pa Aruba.”

Aruba a hasi sinku proposishon konkreto na Hulanda ku lo permití e dos paisnan fortalesé otro su puntonan fuerte i alkansá nan metanan. Por ehèmpel, TNO ta trahando huntu ku Universidat di Aruba pa tèst tur tipo di produkto i idea na Aruba.

Eman a ilustrá su punto: “Nos tin un surplus di solo i bientu. TNO por hasi estudio i tèst produkto akí henter aña largu. Si Brazil ke bende mulina di bientu na Europa, nan ta dal den un opstákulo: nan produkto ta deskonosí. Si TNO sertifiká e mulinanan di bientu na Aruba, ya e asuntu a kambia. Ku un enfoke asina, Brazil ta sali ganá ya ku e ta haña un merkado grandi pa su produktonan, Hulanda ta sali ganá pasobra e ta bende konosementu i teknologia, i Aruba tambe pasobra e ta ofresé e kontakto- i fasilidatnan”.

Igualdat i benefisio mutuo
Meskos ta konta pa e kolaborashon ku ta andando kaba entre Schiphol i Aeropuerto Reina Beatrix. E premier ta splika: “Gerentenan di aeropuertonan di diferente tamaño na Suramérika por bini Aruba pa mira di aserka kon Schiphol ta yuda Aruba optimalisá su aeropuerto den sentido operashonal i komersial, i despues nan lo por kontratá Schiphol pa yuda nan tambe. Atrobe, tur e partinan enbolbí ta sali benefisiá.” Otro inisiativanan tin di haber ku Gasunie i Rietveld Academie.

Djabièrnè Eman i minister Piet Hein Donner (Asuntunan Interno i Relashonnan den Reino) a firma un protokòl di kooperashon ‘basá riba igualdat i benefisio mutuo’. Pues, awor ya e pregunta no ta ‘kiko Hulanda por hasi pa Aruba’, sino ‘kiko tur dos pais por hasi pa otro’, e dos mandatarionan a deklará.

• Download Samenwerkingsprotocol Nederland-Aruba (235kb, pdf)