Elekshonnan parlamentario na Antia lo tuma lugá dia 22 di yanüari 2010. Konseho di Minister di Antia hulandes a anunsiá esaki djárason.
 
Verano ku a pasa tabatin basta sansaña tokante e elekshonnan. Gobiernu antiano bou di guia di promé minister Emily de Jongh-Elhage a proponé pa no bai urna elektoral, pasobra lo disolvé pais Antia segun planiashon na òktober 2010. Despues lo tene na diferente isla elekshon atrobe.
 
Raad van Advies di Antia hulandes a konsehá gobièrnu fin di ougùstùs ku posponementu no ta deseabel for di un punto di bista hurídiko i demokrátiko. Ademas e konseho ta haña ku tin un base di sosten amplio pa elekshon serka e pueblo antiano. 
 
E preparashonnan dje reformashon estatal kaminda Kòrsou i Sint Maarten lo bira paisnan outónomo den Reino hulandes i e islanan Boneiru, Statia i Saba munisipionan ekstraordinario di Hulanda, ta sòru pa basta sansaña.
 
Banda di esei Boneiru a anunsiá djamars ku lo e tene un referèndem atrobe tokante e plannan.