Ocho sientífiko a keda kondekorá ku orden di Leon Ulandes. Un di nan ta e Rubiano sientífiko, Edward 'Bing' Cheung. Orde van de Nederlandse Leeuw ta e kondekorashon di mas haltu ku un persona por haña den Reino ulandes. Ta duna e orden aki solamente pa un prestashon eksepshonal ku a hasi pa komunidat uzando talentonan speshal.

Cheung ta traha na Merka pa e organisashon di siensia espasial, NASA. El a haña e kondekorashon real pa su aporte na e 'Hubble Space Telescope' (HST), ku ta hasi opservashonnan óptiko den espasio. Edward Cheung, miho konosí komo 'Bing' a diseñá un aparato ku astronoutanan por drecha e sistema di fria di un 'hubble'. El a yama e aparato Aruba.

Ta bale la pena warda
Cheung ta masha kontentu ku su kondekorashon. For di 2008 el a tende ku a rekomend'é pero despues no a tende nada mas. E aña aki atrobe e tabata spera pero no a kere ku un di e Leonnan lo ta p'é. Porfin e dia a yega. Dor di Cheung Aruba su imagen a bira aún mas internashonal i ta zona den espasio.