Despues di a biba 43 aña na Hulanda, a yega e momento pa Ed Gumbs (63) regresá su 'roots' na e Antia di ántes. Tanten ku e ta den kondishon ainda, e èks polítiko i miembro di partido PvdA ke yuda ku desaroyo i edifikashon di e islanan antiano. Apesar ku e ta sinti su mes na kas na tur e islanan, Sint Maarten ta su favorito. Aya Gumbs ta serka band'i Anguilla, isla natal di su tata.

Gumbs ta kore rònt den kayanan di Sint Maarten manera kos ku nunka e n'bai for di einan. Tur kaminda e ta topa ku hende k'e konosé anto e ta para un ratu pa kòmbersá. Ma Gumbs ta bibando 43 aña kaba na Hulanda. Den tur e añanan k'e tabata afó, e no a lubidá su isla natal niun ora so. Awor ta basta pa Ed Gumbs, despues di a biba mas ku kuater desenio na Hulanda. Gustosamente e ke regresá region karibense.

Antepasadonan
Gumbs a lanta na Kòrsou, ma tòg e ta preferá Sint Maarten, isla natal di su mayornan. E èks polítiko tin laso estrecho tambe ku Anguilla. Su welanan ta djaya i aya su tata ta derá.

Por mira zona kostal di Anguilla kla kla for di Sint Maarten. Ta p'esei Gumbs ta blo mustra den direkshon dje isla ingles na otro banda di laman. ‘Bo ta mir'e kasitanan blanku ayá, ei ta Anguilla, ei ta ‘roots’ di mi antepasadonan’, e ta bisa yen di orguyo.

Gumbs tin dushi rekuèrdo di Hulanda. ‘Ta un pais bunita i sosial ku hopi oportunidat, mi ta'tin nan i mi a hasi uzo di nan’. Ma segun Gumbs awor a bira tempu pa kontribuí ku desaroyo di su isla. Den tur e añanan ei el a bai Antia bèk na diferente okashon. El a haña chèns di mira e desaroyonan djaserka tambe. ‘Si bo mira unda i dikon kos ta stanka, bo ta haña gana di aportá ’.

Gumbs ta konsiderá e deseo pa regresá su lugá komo un proseso natural. ‘Olifantenan ta bai bèk selva pa rebibá nan temporada kualitativo leu ayá den mondi.' Regresá definitivamente por ta un deseo grandi, pero Gumbs sa di eksperiensha ku esaki no ta un tarea fásil. ‘Despues di 43 aña bo tin ku baha man poko anto esei ta eksigí tempu. Mi a pasa un parti grandi di mi bida na Hulanda, no por kore kab'é ku'n desishon’.
 
Ayó Hulanda
Pa Gumbs, remigrá ta nifiká lébumai Hulanda. ‘Si bo no ser'e kapítulo ei definitivamente, ta difísil kustumá n'e islanan’. Ta p'esei el a disidí di dediká un par di aña n'e proseso ei. Ku su formashon finansiero-atministrativo e ta dal bai komo kònsùltent na Sint Maarten p'un periodo di mei aña.

Partisipá n'e proseso laboral na Sint Maarten no ta bai asina asina, segun Gumbs. ‘Mi mester adaptámi n'e situashon nobo, e hendenan djaki nò. Esaki ta pidi hopi perseveransha, pasó bo tin e maña di kompará tur kos ku Hulanda’. Segun Gumbs, esei ta tabú. Ademas el a pone su mes pa no hansha nunka i pa e tuma e kosnan mané nan ta bin.

Brasa
Mas ku nada Gumbs ta gosa dje kalor di Sint Maarten. Kadabes mi spièrta mainta anto mi mira e serunan bèrdè rondó dimi, disfrutando di holó dushi dje isla i mirando e dinamismo insular, ta komosifuera ta dunámi un ‘brasa’ sumamente kaluroso di welcome home’. I ta e kosnan aki ta pone ku te dia djawe, e nesesidat pa bai region karibense bèk a keda mes intenso, despues di tur e añanan di estadia na Hulanda.