Radio Energia 97.1 ta e emisora nobo ku for di febrüari ultimo ta transmitiendo notisia i farándula den aire boneriano ‘pa tur hende i yen di energia dinámiko’, segun su direktora Emeralda ‘Esmee’ Huerta. Ta trata aki di un proyekto ku e tin basta aña ta prepará huntu ku su kasá, èks polítiko Ramoncito Booi.

“E ta mi konsehero, pero ta ami ta dirigí e empresa”, segun Huerta, maske e no ta nenga sí ku ta ‘nan’ emisora e ta. Mesora e ta bisa aserka ku e emisora “no tin nada di haber ku polítika, aunke de bes en kuando nos ta invitá polítiko sí pa nos programa ‘Entrevista ku Energia’.

‘Kan-kan mesora’
E hóben emisora sa kon pa move e poblashon lokal – algu ku tin e spònsernan masha kontentu. “Ora nos papia bon di un sierto produkto den nos programa diario di kushina anto bisa unda por kumpr’é, e tienda ta yena kan-kan di hende mesora”, Huerta ta konta ku hopi orguyo. Na febrüari el a ofresé spònsernan un kontrakt di seis luna i ‘tur hende a prolong’é’.

Segun Huerta, eventonan sosial tambe ta bira mihó bishitá ora su emisora duna nan sosten: “Fin di siman pasá nos a transmití un konsierto di Orange Grove i dirèkt su tras un sertámen di Miss Sport kaminda un di nos dj-nan a fungi komo maestro di seremonia. Despues e organisadónan di tur dos evento a rekonosé na mi ku nan tabatin un públiko mas grandi ku normal i ku riba e lugá di parker nan a ripará hopi kara nobo ku radio habrí duru na Radio Energia”, segun Huerta.

Talento hubenil
Huerta, ruman muhé di Armando i Argenis Huerta, personalidatnan den medionan di komunikashon na Kòrsou, a krea un programashon kompleto di 6 or di mainta te meianochi. Den siman tin programa religioso, di kushina, beyesa, músika retro, notisia i deporte, un tras di otro. Den fin di siman tin mas muzik.

Den siman tramèrdia, di 3 pa 5 or, hubentut ta tuma kontròl di e studio ku ‘Energia Online’, un programa den kua hóbennan ta transmití muzik i konkurso di pregunta. Tur luna nan ta trata un sierto tema – e luna akí ta ‘amor’. “Lo trata tur forma di amor i tambe kiko ta kosnan ku bo por stima”, Huerta ta splika.