Den sala di entrada abou na hospital Sehos un hòmber ta wak su dilanti sin smak. Bande dje un hòmber ta kome airu maner’un piská riba tera i ta trata di trese un kuchara na su boka pasando rònt di un stèlashi ku tin rondó di su kabes. E atmósfera ta pisa i holó di malesa ta sofokante, te ora ku di repente harimentu ta basha bini abou for di promé piso. Harimentu di mucha. E man ku e kuchara ta keda kologá den laira i un sonrisa di rekonosementu ta aparesé riba kara di e dos pashèntnan. ‘The CliniClowns have entered the building.’

Kòrsou tin un total di sinku CliniClown. Yolanda Faneyt (35) i Nadja Demei (27) ta dos di nan. Nan tur dos ta traha fulltime komo CliniClown na Sehos i otro instansha di kuido médiko na Kòrsou. “Sinku aña pasá na Hulanda m’a sera konosí ku CliniClowns i mes ora mi tabata sa ku esaki ta loke mi ke hasi”, Faneyt, ku komo CliniClown yama Ola, ta bisa. Pa Demei, mihó konosi komo Sisi, tambe tres aña pasa tabata ‘amor mes ora’. “Pero no tabata fasil pa bira CliniClown. For di kuarenta kandidato a shohemi huntu ku tres otro hende. I djei e trabou mes ta kuminsá pasobra banda di bishita na mucha nos mester train diariamente tambe.”

Hari ta importante
“Loke CliniClowns ta hasi ta importante pa mucha”, pedagogo sosial Titiana Rach ta konta. Sinku aña pasá el a buska CliniClowns pa bini Kòrsou i esaki ‘no a duel e niun sekònde’. “CliniClowns ta un komprondementu na departamentu di mucha na Sehos i e muchanan ta puntra pa nan. Yegada di CliniClowns ta pone ku nan por wanta infüs fastioso, tratamentu di chemo i operashon. Nan tin algu pa bira kontentu.”

Un profeshon ku kurashi
Bon mira Demei ta masha tímido ora e no bisti su nanishi di CliniClown. “Komo Sisi mi ta papia hopi mas i mi tin mas kurashi tambe. “Kurashi bo tin mester pasobra na e departamentu di mucha bo ta sintibo sin niun poder ora bo mira e chikínan bringa doló di hende grandi. Faneyt i Demei ta mira esaki tur dia. “Nos a skohe konsientemente pa no sa ki falta e muchanan, pasobra nos ke trata nan manera mucha, nò manera pashènt. Ademas si bo sa ki falta nan, e kos ta bira èkstra pisá.”

Momentonan mas pió
Un di e momentonan di mas pisá pa Faneyt i Demei ta dia ku nan beibi favorito a sali for di hòspital anto algun dia despues su mama a mat ‘é. I tambe e biaha ku un mucha masha kontentu ku no tabata parse di ta falta nada serio a muri di un dia pa otro. “Nos ta konsolá nos mes ku e sabiduria ku di tur manera durante nan bida nos a pone nan hari.”