Aruba ke bin ku diferente medida pa fasilitá regreso di studiante. Promé minister Mike Eman a anunsiá esaki den un enkuentro ku studiante arubano, ku a tuma lugá na Rotterdam siman pasá. Su gobièrnu ta bai bin ku un proposishon pa un areglo pa kada studiante ku terminá su estudio den un término aseptabel. Si nan regresá Aruba bèk denter di tres aña, nan ta bin na remarke pa un redukshon supstansial di entre trinta i kuarenta porshento riba e fiansa pa nan estudio.

Promé minister Eman a bisa e studiantenan ku e ke ta un mandatario pará kla pa risibí nan na yegada di avion, pa brasa nan, bisa nan ku tin trabou, kas i hopi oportunidat. E eksonerashon parsial di debe di estudio ta pues su inisiativa. E ke stimulá studiantenan arubano pa bai nan isla natal bèk. E ke ta nan benefaktor.

Dyantha Maduro ta e promé studiante ku ta risibí un deskuento di kuarenta porshento riba su debe di estudio. Siman pasá Mike Eman a deklará durante su bishita di trabou na Hulanda, ku lo bin medida pa fasilitá regreso di studiante rubiano. Redukshon di debe ta parti di e medidanan aki. 

Arubahuis a elogiá Dyantha djaluna pasá. Fuera di esei e ta e promé studiante arubano, ku a firma den e 'buki di logro', un buki pa studiantenan arubano ku kaba nan estudio. Djawó padilanti Arubahuis ta invitá e studiantenan akí pa  bin un resepshon chikí pa pone nan firma den e buki. Den biblioteka di Arubahuis a reservá un lugá speshal pa nan tesis.

Ta un onor pa Maduro ku e por hasi uso di e areglo nobo di deskuento riba fiansa komo e promé studiante. E ta kere ku ta importante ku gobièrnu ta mustra atenshon i apreshon na e studiantenan.

Dyantha ta kontentu ku e dispensashon parsial, pasó unabes ku e yega Aruba, su suèldu ta bai ta na florin, siendo ku e debe ku el a kumulá durante su estudio ta na euro. "Mi ta bai papia ku mi mèntor wak kiko mester hasi pa pidi e deskuento." Arubahuis a festeh'é djaluna 23 di novèmber.

Maduro no ta mashá sigur si mas studiante lo ta dispuesto na bai bèk Aruba pa motibu di e areglo.  "E kos ei ta algu masha personal. Nan ke eksperiensha i Hulanda ta ofresé mas posibilidat ku Aruba. E tin di aber tambe ku índole di e estudio ku bo a sigui. Mi ta kere ku loke ami a studia, esta riba tereno di Arte i Edukashon, tin sufisiente djòp na Aruba."
 

Dia 10 di desèmber e ta regresá Aruba pa buska un trabou.

Skucha Dyantha Maduro den kòmbersashon ku Leila Wijnhoven