KRALENDIJK – Representante di Reino pa islanan BES, Wilbert Stolte ta haña ku ta muchu trempan ainda pa reakshoná riba nombramentu di Willem Cecilia komo grefir di Kuerpo Públiko Boneiru. Ta te ora Stolte aprobá e nombramentu, Cecilia por kuminsá traha. Te ainda Stolte por desaprobá e nombramentu.

Willem Cecilia su nombramentu a lòs hopi diskushon riba e isla. Un mayoria den eilandsraad (UPB/Santana) a nombra Cecilia dia 24 di yanüari. Pero e komishon di konfiansa enkargá ku e nombramentu í oposishon no tabata di akuerdo. Segun nan tabatin dos kandidato mas adekuá.

Karta
E frakshonnan di Partido Demokrátiko Boneriano (PDB) i Movementu Boneiru Liber (MBL), tur dos di oposishon, kuminsamentu di e luna aki den un karta na Representante di Reino a pidi pa tene kuenta ku nan opheshonnan. Nan ta bisa ku tabata trata di ‘selekshon i tumamentu di desishon deskuidá’.

Èks gezaghèber Glenn Thodé ku ta presidente di e komishon di konfiansa, tambe ta aklará su eskoho di un otro kandidato den un karta na presidente di konseho insular. Den su karta Thodé ta bisa ku su rekomendashon ta hopi kla: “E kandidato mester ta un hende ku ta sirbi hente e konseho i ku no tin dependensha evidente ku ningun frakshon òf koalishon òf oposishon”. Konseho mester yega na un konsenso tokante e nombramentu, Thodé ta haña. Ta eksisti un sospecho ku Cecilia tin laso ku UPB/Santana.

Valido
Stolte den un karta na frakshonnan di oposishon a indiká kaba ku segun Lei kuerponan públiko di Boneiru, Sint Eustatiusi Saba (WolBES) e no por duna rekomendashon pro nombramentu di grefir. Ta despues di e nombramentu e por aprobá òf desaprobá. Un nombramentu sin Stolte su aprobashon no ta valido

E legislashon di WolBES ta disidí tambe ku grefir no por kuminsá traha mientras ku Stolte no duna su aprobashon. Stolte tin dos be 13 siman di tempu pa tuma un desishon. Si desaprobá e nombramentu Cecilia por apelá i entregá un opheshon seka e representante di Reino.